Pơma pơgơ̆r tơ̆ Hop akŏm, Tổng Bí thư, Kơdră teh đak Tô Lâm pơma hơdăh, yak mơ̆t lơ̆m chăl hơtŏk tơiung ‘nao kơ teh đak, jang tơbôl kơ Việt Nam tơƀôh tơdrong tơplih ‘nao đon tơchĕng, tơƀôh hơdăh yua đơ̆ng nơ̆r tơgop tih đei tơdrong pơjing ‘lơ̆ng đon tơchĕng. Jang tơbôl đei băt hơdăh ‘noh jĭ hơnăp jang tơm, hơnơ̆ng, vei hơnăp jang hơdrol lơ̆m vei lăng teh đak đơ̆ng hrôih, đơ̆ng hơtăih păng pơjing cham char apŭng plĕnh teh hiôk ăn hơtŏk tơiung teh đak. Jang tơbôl athei hơtŏk tơiung tơgăl hăm anih dơ̆ng păng tơdrong ‘lơ̆ng joh ayŏ kơ hơdrĕch hơdrŭng, tơgop tơƀôh hơdăh um rup mĭnh Việt Nam rơngei hiôk hian, pơm tơ ‘ngla kơdih, jang hơdai păng đei jang tơnăp.

Tơdrong ‘lơ̆ng đơ̆ng jang tơbôl ‘noh jĭ pơm tơ ‘ngla kơdih trong jang păng chă hơdrin jang tŏk kơdih đơ̆ng hơdrĕch hơdrŭng, vei sơđơ̆ng ‘lơ̆ng hloh tơdrong đei yua ăn teh đak - hơdrĕch hơdrŭng, iŏk kon pơlei pơm tơm kơ rim trong jang tơgŭm păng lăng tơdrong tơgop ăn tơpôl apŭng plĕnh teh ‘noh jĭ hơnăp jang. Hơdai hăm ‘noh, jang tơbôl jĭ tơdrong jang kơ đĭ đăng Đảng, đĭ đăng kon pơlei, hơtŏk jơhngơ̆m pran akŏm đơ̆ng pơđĭ khŭl jang chĭnh trĭ păng kơ teh đak.