Tơ̆ hop akŏm, bơngai tang măt ăn Khŭl tang măt Quốc hội dêh char Đắk Lắk hlôi roi tơbăt truh bơngai tah hla dôm jơnei gĭt kăl đơ̆ng ‘măng hop akŏm, lơ̆m noh pơma hơdăh lơ hla ar luơ̆t păng tơdrong tơchơ̆t đei pơdrơ̆ng kiơ̆; dôm trong jang tơgŭm tih găh hơtŏk tơiung mŭk drăm - tơpôl, jên jang teh đak; kŭm hăm tơdrong jang rơih bơngai jang păng lơ tơdrong ƀơm kơtă truh tơdrong hơrih sa kon pơlei. Bơngai tăh hla dêh char Đắk Lắk tơƀôh tơdrong drơ̆ng lăp hăm dôm jơnei mă Quốc hội iŏk đei, hơdai hăm tơroi lơ nơ̆r apĭnh vă hơnơ̆ng jang pơkeh tơdrong jang tơgŭm păng hơmet pơ ‘lơ̆ng dôm tơdrong yan âu kơ tơring.

Lơ̆m kơsô̆ dôm tơdrong đei bơngai tăh hla Đắk Lắk bơngơ̆t truh roi tơbăt ‘noh jĭ tơdrong phŏng ya, hơdrĕch ‘long pơtăm, kon tơrong ưh kơ ‘lơ̆ng đei roi tơƀôh ƀônh ƀŏ păng đei ƀôh jơ̆p jang tơ̆ lơ̆m dôm mang tơpôl. Bơngai tăh hla ‘meh vă dôm anih jang kơpal pơm kơhret tơdrong vei lăng tĕch mơdro tơmam ăn choh jang sa, hơmet ming tơdrong roi tơƀôh glăi ưh kơ trŏ tơpă păng phak tơpăt dôm bơngai pơm glăi.

Hơdai hăm ‘noh, dôm tơdrong kon pơlei oei sa nai kŭm đei lơ bơngai tăh hla dêh char Đắk Lắk tơroi truh, mă loi ‘noh jĭ dôm dơnâu mong đak đei hư răm tôch kơ dêh đơ̆ng rŏng ‘măng ‘mi tih đak lơ̆p âu ki. Bơngai tăh hla athei dêh char jăh dăr hơlen, akŏm kơsô̆ hiong răm păng hơmet ăn jên pơm hơmet ming, man dơ̆ng dôm hơnih đei ƀơm ưh kơ ‘lơ̆ng.