Nơ̆r tơchơ̆t 67 đơ̆ng Anĭh tơm Chĭnh trĭ, Tơdrong tơchơ̆t 72/2022/QH15 đơ̆ng Quốc hội tơƀô̆h hơdăh tơdrong tơrek tôch dêh đơ̆ng Trung ương, pơjing trong jang tơgŭm păng jên, tơmam vă bơ̆ jang tơiung pơjing Buôn Ma Thuột jing tơring kơdrâm tơm tơ̆ Tây Nguyên.

Dôm tơdrong tơgŭm âu pơjing đei trong jang chĭnh trĭ, khôi luơ̆t gĭt kăl vă Dak Lăk pơ ‘nhŏ jên jang, tưk tơiung Buôn Ma Thuột. Mă loi, Tơdrong tơchơ̆t 72 chih hơdăh 5 grŭp jang gĭt kăl găh jên hu, jên jang, proh hơmet trong jang, sơng iŏk jên jang păng bơngai jang hơgei. Lơ̆m noh, tơdrong jang tơlĕch dơ̆ng 45% jên jang hơnơ̆ng hlôi hơnhăk đei lơ tơdrong đei yua ‘lơ̆ng.

Jăl jang đơ̆ng 2021–2025, akŏm đĭ đăng jên tơmơ̆t jang atŏk tơiung tơpôl tơ̆ Buôn Ma Thuột đei hloh 125.000 ti hlak jên. Anih jang tơ̆ tơring kơdrâm, trong nơnăm, anih jang pơgang, pơtho pơhrăm đei tơrek truh; dôm tơring jang kơmăy kơmŏk sơng đei dơ̆ng lơ tơdrong jang, vang tơgop hơmet pơ 'lơ̆ng hơnăp jang đơ̆ng tơring kơdrâm.

Mă lei, ƀok Cao Đình Huy, Kơdră Anih vei lăng jên hu dêh char Dak Lăk akhan, tơdrong jang tŏk tam mă tơgăl hăm dôm tơdrong ‘lơ̆ng. Lơ̆m 10 tơdrong hơgăt tơm, đei 5 tơdrong hơgăt jang tam mă đei. Mŭk drăm tơ̆ tơring kơdrâm tam mă đei anih tơƀôh trong chong glung, tam mă sơng đei Anih tơmât jên jang pran ‘lơ̆ng păng tơdrong jang tih. Kơmăy kơmŏk pơm tơmam ‘lơ̆ng, logistics, chă tơmang lăng tam mă tŏk pran păng tơdrong tơguăt tơring oei đei tơdrong ưh kơ ‘lơ̆ng: “Đei 3 tơdrong tơgŭm tam mă đei iŏk yoa ‘lơ̆ng tơ̆ yăn âu. Mă 1 ‘nŏh jĭ tơdrong tơgŭm hơtŏk jên asong tŏk iŏk, tam mă iŏk yoa ‘lơ̆ng jên tŏk iŏk, mă 2 tơgŭm thuê̆ jang xa đei ăn anih tĕch mơdro, tam mă đei tơdrong jang vă gơh xa yoa tơdrong tơgŭm păng mă 3 ‘nŏh tơdrong tơgŭm sơng iŏk bơngai jang rơgei, bơngai jang khoa hŏk tam mă sơng đei lơ bơngai truh.”

Kiơ̆ đơ̆ng hơlen năng Nơ̆r tơchơ̆t 67 păng tơdrong tơchơ̆t 72, Dak Lăk apinh  Trung ương hơnơ̆ng bơ̆ jang, hơmet ming dôm trong jang hlôi đei yoa ‘lơ̆ng; tơchĕng hơlen choh tơlĕch dơ̆ng tơdrong tơgŭm găh anigh jang, trong nơnăm, jang tŏk rơgŏh ‘lơ̆ng, jang khoa hŏk kơmăy kơmŏk, logistics păng tơguăt tơring. Dak Lăk oei athei pơih xă tơdrong tơgŭm tơlĕch dơ̆ng 45% jên jang hơnơ̆ng, lăp hăm tơdrong vă jang tŏk lơ̆m chăl ‘nao, tơklep hăm dôm anih jang pran ‘lơ̆ng Buôn Ma Thuột – Buôn Hồ păng Tuy Hòa – Đông Hòa.

Ƀok Lương Nguyễn Minh Triết, Bí thư Đảng dêh char Dak Lăk akhan, dôm tơdrong tơgŭm gĭt kăl mă Trung ương ‘măn ăn Buôn Ma Thuột jĭ tơdrong ‘lơ̆ng păng hơnăp jang tih đơ̆ng tơring. Ƀât mă dêh char Dak Lăk ‘nao đei dơ̆ng anih ‘lơ̆ng vă jang tŏk, tơdrong jang kiơ̆ dôm tơdrong tơgŭm âu athei tơklep hăm tơdrong chĕng hơmet, tơproh trong jang atŭm kơ tơring kơdrâm Buôn Ma Thuột truh sơnăm 2050, hơtŏk tơdrong tơguăt hơdai păng tơiung hơnăp jang tơm đơ̆ng tơring kơdrâm gĭt kăl jơ̆p tơring: “Trong jang hlôi đei, tơdrong tơproh jang hlôi đei roi tơbăt, dôm tơdrong jang tơm kŭm hlôi chih hơdăh, tơdrong kăl hlŏh jĭ trong pơgơ̆r bơ̆ jang. Yă kiơ hlôi jang đei athei hơlen năng mă tôm yoa kiơ gơ̆h jang đei; yă kiơ tam mă jang đei kŭm athei hơlen năng mă nhen, kơlih yoa kiơ.”

Ƀok Nguyễn Đức Trung, Phŏ Kơdră Anih tơlĕch trong jang gĭt kăl kơ Trung ương pơma hơdăh, trong tơgŭm gĭt kăl lăp gơ̆h đei yoa ‘lơ̆ng mưh năm hơdoi hăm jơhngâm pran, pơgơ̆r bơ̆ jang, iŏk yoa ‘lơ̆ng rim tơdrong tơgŭm đĕch. Trung ương chih hơdăh, tơgŭm ăn dôm nơ̆r pơma apinh đơ̆ng dêh char, mă lei athei chă rơih dôm tơdrong tơgŭm yơ kăl hlŏh, tơm hlŏh, sek tơlang trŏ tơdrong tơhlăk, ƀôh hơdăh tơdrong đei yoa păng gơ̆h jang kiơ̆: “Tơdrong tơgŭm gĭt kăl lăp gơ̆h đei yoa mưh đei trong jang lăp hăm yăn âu păng yak hơdoi hăm tơdrong gơ̆h pơgơ̆r jang păng iŏk yoa ‘lơ̆ng jên jang đei tơgŭm. Trong tơgŭm lăp 1 păh đĕch, tơdrong pơgơ̆r bơ̆ jang ‘lơ̆ng, rơgei ‘nŏh jĭ tơdrong kăl hlŏh”.

Tơdrong hơnơ̆ng hơmet pơ ‘lơ̆ng dôm tơdrong tơgŭm vă atŏk tơiung Buôn Ma Thuột ưh lăp vă hơmet pơ ‘lơ̆ng dôm tơdrong pơmat tat ƀât măt dang ei đĕch, mă oei pơjing jơhngâm pran vă tơring kơdrâm tưk tơiung hơnăp jang tơm, tơguăt tơring păng chông trong jang tŏk mŭk drăm, tơpôl kơ dêh char Đắk Lắk ‘nao păng jơ̆p tơring Tây Nguyên. Mă lei, đơ̆ng trong jang, tơdrong tơgŭm truh tơdrong jang đei tơ̆ yăn âu oei kăl đei đon pơhnŏng, kơchăng, adrin tôch ai lơ̆m tơdrong pơgơ̆r bơ̆ jang dơ̆ng. ‘Nâu gô jing tơdrong gĭt kăl vă pơm dôm tơdrong ‘lơ̆ng găh tơdrong tơgŭm, jên hu, tơmam drăm jing jơhngâm pran vă jang tŏk, hơnhăk Buôn Ma Thuột jang tŏk tơgăl hăm anih dơ̆ng đơ̆ng tơring kơdrâm tơm tơ̆ tơring.