Đăk Lăk dang ei đei 104 hla bar asong sir kôch tơmam kăp gĭt lơ̆m teh oei đei yua, lơ̆m noh đei 12 hla bar asong pơm jang kơtă ăn dôm tơdrong ming man kơ teh đak, 14 hla bar asong jang păng sơkơ̆t hơdah thu iŏk tơmam kăp gĭt lơ̆m teh hăm dôm tơdrong ming man, hăm kơsô̆ pơkăp gơh sir kôch hloh 8,2 triu m³.

Gah jăl IV/2026, tơdrong kăl kơ 44 tơdrong ming man, păng tơ̆ tơring pơhlom  690.000 m³. Mă lơ tơdrong ming man hlôi đei hơnih asong tơmam ming man, chŏng mă minh ƀar jơnŭm vei lăng adoi oei kơƀah tơmo, rơga, kơjă tơmam ming man lơ̆m tơring tŏk kăp. Ƀok Đỗ Hữu Huy, Kơdră Hơnih vei lăng kon pơlei dêh char Đăk Lăk akhan, tơdrong mă ou noh kơlih minh ƀar hơlŭng tơmam kăp gĭt lơ̆m teh tam mă đei iŏk yua kơlih tơhlăk tăk gah hla bar teh, cham char; tơdrong asong tơmam ming man tơ̆ minh ƀar hơlŭng tơmo gĭt ưh đei trŏ nhen tơchơ̆t.

Kơdră Hơnih vei lăng kon pơlei dêh char Đăk Lăk athei hơlen tôm tơdrong jang đơ̆ng sir kôch, tĕch răt kiơ̆ hơnih jang mŭk drăm truh chơ pơdŭ tơmam ming man. Gah kơsô̆, huă đơn điê̆n tưh, ăn thuê̆ păng chă chơ tơmam drăm athei đei tơroh, pơtêng; iŏk yua kơmăi kơsô̆, trĭ tuê̆ nhơ̆n tăo păng um rup vê̆ tinh vă hơlen băt gah tơdrong ưh kơ 'lơ̆ng, mă kăl noh gah tơdrong sir kôch hloh kơ tơdrong pơkăp, sir kôch ah kơmăng dah mă pơkăp tơmo ming man sir kôch glăi.

Hăm kơjă tĕch, Kơdră Hơnih vei lăng kon pơlei dêh char Đăk Lăk pơgơ̆r hăm rim hơnih juăt jang tơbang hơdah kơjă tơmam ming man mă tơtom, trŏ kiơ̆ rim hơlŭng tơmo kăp gĭt, jô̆ trŏ jên jang sir kôch, chơ pơdŭ; ưh đei lê̆ kơjă tơbang ưh đei hơtŏ hăm tơring tĕch răt, pơm ăn hơnih jang mŭk drăm athei hơtŏk kơjă kiơ̆ đơ̆ng dôm hơnih jang ưh hơdah. Rim hơnih jang mŭk drăm athei pơkăp, chih hơdah kơjă mă tơpăt, tĕch răt trŏ kơjă pơkăp, chih huă đơn trŏ tơpă; ưh đei pơdro, vei tơmam pơm ăn tơmam jing khăi, pơđăp dih băl gah kơjă dah mă hơtŏk kơjă kiơ̆ đơ̆ng hơnih tĕch, hơnih jang mŭk drăm chơ pơdŭ tơmam drăm:  “Lơ̆m khei năr kơnh kơdră chĕp pơgơ̆r Hơnih bơ̆ jang gô atŏk kơtang năm dăr lăng hăt hot găh hla bơar ăn asong jang, tơm a la chă tơmam kơjă, hla bơar kơjă tĕch răt, chơ pơdŭ, đơ̆ng noh tơdrong ba thuê̆ jên păng tơdrong kĕ tech ăn rim tơdrong vă jang. Mă kăl lăng kơjăp rim tơring đei kơjă tơplih kơtang, tơdrong tơroi tơbăt ưh kơ măh, pơ-‘ngơ̆m tơmam đei ƀôh pơm glăi. Mưh đei ƀôh pơm glăi tơroi tơbăt ăn hloi Kơdră chĕp pơgơ̆r Hơnih vei lăng kon pơlei dêh char athei rim hơnih bơ̆ jang năm dăr lăng, lăng hơlen hơdăh xek tơlang kơhret kiơ̆ tơdrong tơchơ̆t.”