Kơting linh Ƀô đô̆i Việt Nam lôch tang ăn teh đak đei chă ƀôh tơ̆ tơring Tà Veng Lơ, dêh char Ratanakiri (Campuchia), păng tơring Suối Phooc, dêh char Attapư (Lào). Kŭm hăm kơting linh lôch tang teh đak, Khul K53 oei chă ƀôh lơ tơmam nhen kuăl tăng, che yu, ƀrâm AK, tơkhiĕn nhôm, chơ khŏ cao su ... 5 kơ̆l linh lôch tang teh đak đei chă ƀôh ‘măng mă âu tam mă băt hơdăh hơnăn.

Thoi noh, đơ̆ng blŭng pơyan phang truh dang ei, kăn ƀô̆, linh Khul K53 dêh char Quảng Ngãi hlôi chă ƀôh, sir akŏm đei 15 kơ̆l linh lôch tang ăn teh đak tơ̆ teh đak boăl, chơ brŏk hrôih kơting đe linh lôch tang teh đak vih dơ̆ng hăm teh đak./.