Đăk Lăk akŏm jơhngơ̆m hơmet tơnap tap đơ̆ng rŏng kơ 'mi kial đak hơbông pơrăm, iŏk yua tơdrong tơguăt tơguăl, khŏm mă keh đang dôm tơchơ̆t jang mŭk drăm – tơpôl, tơdrong tơm noh athei hơtŏk 2 kơsô̆ lơ̆m sơnăm 2026. 'Nou jĭ trong jang đei tơlĕch ah 'Măng hop akŏm mă Ƀar, Hô̆i đŏng kon pơlei dêh char jăl 10, 'nao pơtôch ah kơsơ̆ năr (24/12). Tơ̆ 'măng hop akŏm rim bơngai tang măt drơ̆ng nơ̆r hơlen 24 tơchơ̆t kăp gĭt, pơm trong ăn hơtŏk tơ-iung mŭk drăm – tơpôl sơnăm 2026 păng jăl sơnăm 2026–2031 nhen: pơdui khei năr asong jên jang hăm dôm tơdrong jang yua jên mong kơ tơring; asong atăm jên mong trung ương ăn dôm tơdrong jang đei tơchơ̆t ah sơnăm 2025; pơkăp Kơjă groi teh lơ̆m dêh char Đăk Lăk...

Khul kơdră kơpal dêh char Đăk Lăk pơgơ̆r đơ̆ng dang ei truh Têt Nguyên đan Bính Ngọ 2026, rim hơnih jang tơrĕk jang tơnăp pơkăp pơyua ăn tơpôl, tơgŭm ăn tơdrong hơrih kon pơlei; tơlĕch jang đei jơnei dôm tơdrong tơchơ̆t jang kơ teh đak gah tơjur hin dơnuh kơjăp sơđơ̆ng păng hơtŏk mŭk drăm – tơpôl tơ̆ tơring kon pơlei kon kông. Tơ̆ hơnăp, kăl akŏm tơgŭm kon pơlei hơmet jang xa, sơđơ̆ng tơdrong hơrih, sơđơ̆ng jơhngơ̆m sơng Têt.