Hơnơ̆ng hơtŏk kơtang hơnăp jang tơm lơ̆m tơ iung pơjing khul tơgoăt tơgoăl pôm nơ̆r ƀơ̆r đon hơdrĕch hơdrung, tơ̆ Hop akom tih kơdră tang măt ‘măng mă I, jăl jang 2025–2030, pơgơ̆r lơ̆m 2 năr ‘noh năr 16 păng 17/12, Mặt trận Tổ quốc Việt Nam dêh char Đắk Lắk xơlơ̆t hơdăh 6 tơdrong jang tơm, lăng truh atŏk kơtang lăp đon tơpôl păng atŏk kơtang jơhngŏm pran kon pơlei lơ̆m jăl ‘nao. Khei năr ou ki, Hơnih bơ̆ jang MTTQ Việt Nam dêh char Đắk Lắk hlôi iung jang ‘lơ̆ng hơnăp jang tơm, tơm dơnơm lơ̆m tơ iung pơjing khul tơgoăt tơgoăl pôm nơ̆r ƀơ̆r đon hơdrech hơdrung; atŏk kơtang lăp đon lơ̆m tơpôl, pơjing đei trong jang chinh trĭ gĭt kăl vă dêh char sơđơ̆ng păng atŏk tơ iung lơ̆m jăl đei lơ tơdrong tơplih tih tên găh khul bơ̆ jang. Mặt trận rim hơnih dêh char Đắk Lắk hơnơ̆ng tơƀôh hơdăh hơnăp jang pơchoh trong, hơvơn khul jang, vei lăng năng tông tơdrong hơrih sa tơpôl; mă kăl hloh ‘noh vang iung jang Tơdrong jang xut xa hnam pơgia, hnam hnăt hnot; tơtom pơrô̆ hơvơn, klăh asong rim tơmam drăm tơgum djru ăn kon pơlei hơmet pơ ‘lơ̆ng đơ̆ng ‘mi kial pơrăm, sơđơ̆ng ƀlep bơngai, ƀlep jơ ‘năr. Hop akom tih hlôi drơ̆ng mĭnh nơ̆r 6 tơdrong jang tơm iung jang kăl hloh păng 13 trong tơlĕch jang hơdăh jăl jang 2025–2030.