Hop akŏm iŏk đei 101 nơ̆r pơma đơ̆ng anih tĕch mơdro, HTX păng unh hnam tĕch mơdro, akŏm găh tơdrong hơmet pơ ‘lơ̆ng anih tơmât jên jang, sek tơlang dôm tơdrong pơmat tat ăn tơdrong jang xa, tĕch mơdro păng tưk tơiung anih jang mŭk drăm kơdih. Dôm nơ̆r pơma athei hơmet pơ ‘lơ̆ng trong pơgơ̆r jang, đei trong pơm hla ar roi ƀônh, hơmet pơ ‘lơ̆ng dôm tơdrong oei tơhlăk găh teh, tơproh trong jang, tơlĕch jên jang, pơjing anih jang xa, hiôk hian, ‘lơ̆ng hơiă, atŭm hăm ‘nŏh hơtŏk tơdrong asong tŏk iŏk jên, tơgŭm găh thuê̆ păng dôm tơdrong kăl nai vă gơ̆h jang tŏk.

Yă Võ Thị Hà Giang, bơngai tang măt ăn Grŭp jang cheh phe Trung Nguyên, đei nơ̆r pơma: “Nhôn apinh Trung ương păng dêh char hơnơ̆ng tơchĕng hơlen trong pha ƀiơ̆ ăn dêh char Đắk Lắk ‘moi kiơ̆ 5 tơdrong tơm: găh tơdrong tơgŭm, anih jang, trong nơnăm, khul bơngai jang, jên hu păng khoa hŏk kơmăy kơmŏk.”

Khul bơngai tĕch mơdro kŭm apinh hơtŏk tơdrong tơlĕch jên man anih jang, pơm trong, logistics, anih jang hăm kơmăy sô̆; tơgŭm tơlĕch trong tĕch mơdro, atŏk tơiung tĕch mơdro hăm điên tư, chă tơmang lăng păng sơng iŏk jên jang. Lơ nơ̆r pơma athei hơtŏk tơdrong tơmât yoa khoa hŏk kơmăy kơmŏk, tơplih hăm kơmăy sô̆, roi tơbăt ăn băl dôm kơsô̆ đei chih răk găh tơdrong jang xa, tĕch mơdro; tơtom sek tơlang pơ ‘lơ̆ng dôm tơdrong pơmat tat, tơhlăk tăk ‘nao đei lơ̆m tơdrong jang xa.

Ƀok Trần Khánh Minh, dơ̆ng tang ăn Khul jang chă tơmang lăng dêh char Đắk Lắk đei nơ̆r pơma: “Pơmat tat hlŏh đơ̆ng anih tĕch mơdro hrei ‘nâu, nhôn ‘mĕh jang chă tơmang lăng rơgŏh ‘lơ̆ng mă lei ưh băt vă pơm thoi yơ gơ̆h lăp hăm tơdrong hơgăt ‘lơ̆ng. Yoa ưh đei 1 tơdrong hơgăt rơđăh ‘lơ̆ng, dôm anih jang vei lăng tơ̆ tơring kŭm oei tơhlăk tăk lơ̆m tơdrong ƀơk hla ar phep, vei lăng teh dăh mă ming man dôm anih kăl lơ̆m teh choh jang xa hơdai hăm chă tơmang lăng. Anih tĕch mơdro jang tơpă, đei đon jang tơnăp mă lei oei hli tơvŏk ƀơm tơdrong glăi. Apinh jăh tơlĕch hla ar chih tơdrong hơgăt mă rơđăh vă gơ̆h bơ̆jang kiơ̆ tơdrong jang chă tơmang lăng rơgŏh ‘lơ̆ng.”

Tơl ăn dôm nơ̆r apinh đơ̆ng Khul bơngai tĕch mơdro, ƀok Đỗ Hữu Huy, Kơdră jang pơgia lơ̆m Trung ương Đảng, Kơdră Anih vei lăng kon pơlei dêh char Đắk Lắk ăn tơbăt, tơring hlôi păng tŏk bŏk pơtho tơƀôh akŏm jơhngâm bơ̆ jang mă pran dôm trong jang atŏk tơiung; pơjing Anih pơgơ̆r jang jang tŏk truh 2 kơsô̆ păng dôm grŭp bơ̆ jang vang yak hơdoi, hơmet pơ ‘lơ̆ng pơmat tat ăn anih tĕch mơdro, bơngai tơmât jên jang.

Kiơ̆ ƀok Đỗ Hữu Huy, tơring tôch năng kăl tơdrong hơmet pơ ‘lơ̆ng anih tơmât jên jang xa, tĕch mơdro, hơtŏk tơdrong hơmet ming trong pơm hla ar kiơ̆ trong iŏk khul tĕch mơdro pơm tơm vă pơvih pơvăn: “Anih vei lăng kon pơlei dêh char Đắk Lắk chih hơdăh vang yak hơdoi, răp mơ̆ng păng tơgŭm ăn anih tĕch mơdro, HTX, unh hnam tĕch mơdro ‘nŏh jĭ tơdrong athei bơ̆ jang hơnơ̆ng. Ưh lăp bơ̆ jang lơ̆m hop akŏm đĕch, đon pơhnŏng ‘nŏh đơ̆ng Anih vei lăng kon pơlei dêh char jĭ tơplih ‘nao đơ̆ng vei lăng jing pơvih pơvăn păng vang yak hơdoi kŭm hăm khul tĕch mơdro.”

Pơma pơtôch hop akŏm tơƀâp bơngai tăh hla jĭ khul tĕch mơdro, HTX păng unh hnam tĕch mơdro, ƀok Lương Nguyễn Minh Triết, Kơdră jang lơ̆m Trung ương Đảng, Bí thư Đảng dêh char, Kơdră chĕp kơ̆l Khul tang măt Quốc hội dêh char Đắk Lắk pơma hơdăh đon pơhnŏng chinh trĭ tôch pơneh đơ̆ng dêh char lơ̆m tơdrong hơmet pơ ‘lơ̆ng dôm tơdrong pơmat tat, tơhlăk tăk lơ̆m tơdrong jang xa, tĕch mơdro mă đei yoa ‘lơ̆ng.

Bí thư Đảng dêh char Đắk Lắk pơjao hơnăp jang ăn Anih vei lăng kon pơlei dêh char hơtŏk tơdrong tơplih ming trong pơgơ̆r pơma nuh, răp mơ̆ng, chih iŏk rim nơ̆r pơma, apinh đơ̆ng anih tĕch mơdro. Pơjao hơdăh hơnăp jang ăn rim bơngai, anih jang vă sek tơlang đang ‘lơ̆ng, hrĕnh dôm nơ̆r pơma apinh đơ̆ng kon pơlei gơih ăn. Khul tang măt quốc hội, Jơnum pơgơ̆r kon pơlei dêh char Đắk Lắk kŭm vă pơgơ̆r dăr lăng dôm nơ̆r pơkăp đơ̆ng Anih vei lăng kon pơlei dêh char kŭm nhen dôm anih jang kơpal, tơring tơrang hăm khul bơngai tĕch mơdro:

“Dêh char Đắk Lắk pơma tơbăt 1 ‘măng dơ̆ng, tôch năng kăl hơnăp jang đơ̆ng anih tĕch mơdro pơma atŭm, mă loi jĭ hăm anih jang muk drăm kơdih. ‘Nâu jĭ jơhngâm pran tôch gĭt kăl vă dêh char gơ̆h jang tŏk đei truh 2 kơsô̆ tơ̆ hơnăp kơnh. Nhôn hơpơi ‘mĕh khul bơngai tĕch mơdro hơnơ̆ng kơchăng chă hơlen năng, pơm kiơ̆ mă ‘lơ̆ng dôm tơdrong hơgăt găh luơ̆t, tơplih ‘nao đon tĕch mơdro, tơgĕch iŏk dôm tơdrong tơgŭm đei chih lơ̆m Tơdrong tơchơ̆t 68 đơ̆ng Anih tơm chinh trĭ găh atŏk tơiung mŭk drăm kơdih vă tưk tơiung anih tĕch mơdro.”

Đơ̆ng dôm nơ̆r pơkăp tơ̆ hop akŏm, Đắk Lắk oei tơlĕch nơ̆r tơbăt tôch pran găh 1 khul kơdră pơgơ̆r rơgei, pơjing tơdrong ‘lơ̆ng hiôk hian, iŏk anih tĕch mơdro pơm tơm vă pơvih pơvăn. Tơdrong tơplih trong pơma nuh, klăih song hơdăh hơnăp jang păng dăr lăng dôm tơdrong iŏk đei mưh bơ̆ jang ưh lăp tơgŭm hơmet pơ ‘lơ̆ng dôm tơdrong tơhlăk tăk ƀât măt đĕch mă oei pơjing đon lui ăn khul bơngai tĕch mơdro dơ̆ng. ‘Nâu kŭm jing hơyak năm tôch hơdăh vă hơnhăk tơdrong tơchơ̆t 68 đơ̆ngAnih tơm Chinh trĭ mât tơ̆ yăn âu, pơm ăn tơdrong răp mơ̆ng jing tơdrong vang bơ̆ jang, pơm ăn dôm nơ̆r pơkăp jing tơdrong jang đei rơđăh ‘lơ̆ng mư̆h jang tŏk./.