Kiơ̆ hla ar chih tơroi, akŏm đĭ đăng tơmam jang đei lơ̆m dêh char (GRDP) 6 khei blŭng sơnăm kơ Lâm Đồng lăp đei dang 7,9%, tŏ sĕt ƀiơ̆ kơsô̆ tơlĕch. Tơ̆ hơnăp tơdrong ‘nâu, lơ bơngai tang măt Jơnŭm pơgơ̆r kon pơlei dêh char athei Anih vei lăng kon pơlei dêh char pơm hơdăh dôm tơdrong vă jang tŏk lơ̆m dôm khei oei đei dơ̆ng ƀât hơtuch sơnăm. Tơl tơblang tơ̆ hnam hôp, kơdră chĕp kơ̆l dôm anih jang kơpal ăn tơbăt, dêh char hlôi hơlen năng, chih iŏk rim trong vă jang tŏk tơ̆ dôm anih jang, tơdrong jang. Lơ̆m noh choh jang xa hơnơ̆ng jĭ jrăng tơjră tơm dơnơm, jang tŏk hlŏh 5%, oei jang kơmăy, ming man păng pơvih pơvăn đei năng jĭ dôm tơdrong jang gơ̆h tŏk pran vă dui hơtŏk dôm tơdrong jang tŏk tam mă pran.

Mĭnh lơ̆m dôm tơdrong đei hơmĕng hlŏh jĭ anih jang kơmăy pơm nhôm. Kiơ̆ ƀok Nguyễn Bá Út, Kơdră Anih vei lăng jang kơmăy, tĕch mơdro Lâm Đồng, kŭm hăm tơlĕch jên jang đơ̆ng teh đak păng hơmet pơ ‘lơ̆ng dôm tơdrong pơmat tat ăn dôm tơdrong jang, anih jang kơmăy gĭt kăl gô đei mât bơ̆ jang lơ̆m jăl khei mă III păng jăl khei mă IV, pơjing jơhngâm pran jang tŏk ăn tơring: "’Năr 9/7 bơ̆n gô đei nhôm tŏ, ‘năr 19/7 gô đei nhôm ‘nhrong păng ‘năr 26/7 ‘nŏh tơlĕch tĕch nhôm mă blŭng. Găh tơdrong jang kơmăy oei đei dơ̆ng, hrei ‘nâu akŏm tơ̆ 14 hnam kơmăy ƀơm truh tơdrong pơm hơmet tơmam tơ̆ dôm tơring jang kơmăy, mă loi jĭ tơ̆ dêh char Bình Thuận so gô đei tơlĕch lơ̆m jăl khei mă III, mă IV. ‘Nâu jĭ dôm tơdrong jang gĭt kăl vang tơgop ăn tơdrong jang tŏk".

Mă lei, lơ bơngai tang măt akhan, chih hơdăh trŏ tơdrong vă jang tŏk ‘nao ‘noh oei tam mă tôm ‘mơ̆i. Tơdrong kăl hlŏh jĭ athei chih hơdăh kơsô̆ vang tơgop đơ̆ng rim tơdrong jang, rim anih jang hăm đon pơhnŏng jang tŏk atŭm, kiơ̆ đơ̆ng noh vang tơgŭm hơmet ming trong jang roi ‘lơ̆ng păng pơih trong hiôk vă anih tang măt ăn kon pơlei dăr lăng tơdrong bơ̆ jang.

Pơma pơtôch hop akŏm, Phó Bí thư Đảng dêh char, Kơdră Jơnŭm pơgơ̆r kon pơlei dêh char Lâm Đồng Lưu Văn Trung pơma hơdăh, khei ‘năr oei đei dơ̆ng lơ̆m sơnăm ưh pă đei lơ, yoa thoi noh lăp pôm dôm tơdrong jang pơm tơlĕch đei tơmam hrôih păng đei kơjă kăp đĕch gơh tơgop ăn tơdrong jang tŏk: "Dôm tơdrong jang pơm tơlĕch hloi tơmam gô tơgop ăn tơdrong jang tŏk ‘nŏh jĭ dôm tơdrong jang găh unh hơyuh, hnam kơmăy unh điên oei ưh kơ đei tơlei chô̆ mưh tơlĕch jên jang đang pơm tơlĕch unh điên hloi, hnam kơmăy nhôm iŏk đơ̆ng dang ei truh đĭ sơnăm, jang đei dôm yơ tân nhôm ‘nŏh gô tơgop ăn tơdrong jang tŏk. Inh athei đei 1 trong jang mă rơđăh hăm rim hnam kơmăy, rim tơdrong jang".

Nơ̆r tơbăt đơ̆ng hnam hôp Lâm Đồng kŭm roi tơƀôh tơdrong ‘mĕh vă atŭm đei tơlĕch hăm lơ tơring Tây Nguyên hrei ‘nâu: ‘meh jang tŏk đei lơ ‘nŏh rim tơdrong jang athei bơ̆ jang hrĕnh, rơđăh ‘lơ̆ng, rim anih jang athei jăh pơm tơlĕch đei tơmam păng chih hơdăh tơdrong vang tơgop đơ̆ng kơdih. Ăp mă dôm tơdrong vă jang tŏk đei bơ̆ jang ‘lơ̆ng, jang đei tơmam kăp gĭt tơ̆ yăn âu đĕch, đon pơhnŏng jang tŏk truh 2 kơsô̆ gơ̆h bơ̆ jang đei tơpă lơ̆m sơnăm 2026.