Kiơ̆ roi tơbăt, 6 khei blŭng sơnăm, akŏm tơmam lơ̆m dêh char Khánh Hoà (GRDP) tŏk 9,03%, dơ̆ng mă 14/34 dêh char, pơlei tơm păng dơ̆ng mă 2 tơring tơ ter đak dơsĭ Nam Trung Bộ - Tây Nguyên. Thu mong jên jang teh đak đei vă jê̆ 28.000 ti hlak jên, jang đang hloh 80% trong tơlĕch jang kơ sơnăm. Hơnih tơmơ̆t jên jang đei tơplih ‘lơ̆ng, rim tơdrong jang joh ayŏ, tơpôl, vei sơđơ̆ng tơdrong arih đei bơngơ̆t truh, sơđơ̆ng tơpôl đei vei kơjăp. Mă lei, lơ bơngai tang măt akhan, đơ̆ng rŏng dôm kơsô̆ ‘lơ̆ng oei đei dôm tơdrong kăl kơ lăng băt tơpăt vă vei sơđơ̆ng jang tŏk kơjăp lơ̆m dôm sơnăm truh. Bơngai tang măt Phan Gia Ngọc, Phŏ Kơdră khŭl vei lăng tơdrong tơchơ̆t khôi luơ̆t, Jơnŭm pơgơ̆r kon pơlei dêh char Khánh Hòa tơblang hơdăh:

“Thu mong jên jang sơnăm ‘nâu đei vă jê̆ 27.930 ti hlak jên mă lei hloh 14.000 ti hlak jên, đei hloh 53%, truh đơ̆ng jên iŏk yua teh păng thuê̆ teh. ‘Nâu jĭ jên thu mong 1 ‘măng. Lơ̆m kơplăh ‘noh, kơsô̆ jên thu mong đơ̆ng anih mơdro sa teh đak păng anih mơdro sa ‘ngoăih kơ teh đak ‘noh jur. Gơh tơroi, mŭk drăm Khánh Hòa tŏk bŏk gơnang lơ̆m teh tơplih yua kơ pơm đei kơjă kơjăp đơ̆ng pơm tơlĕch, tĕch mơdro”.

Kiơ̆ kơ lơ bơngai tang măt, ‘nâu jĭ roi tơbăt lê̆ hơdrol kăl kơ lăng truh yua kơ iŏk đơ̆ng teh ưh kơ kĕ pơdui đunh. ‘Meh pơvei jang tŏk lơ, dêh char kăl kơ hơnơ̆ng hơmet pơ ‘lơ̆ng dôm tơdrong jang tơhlăk tơhlĭn, sơng đei dôm tơdrong jang yak mơ̆t lơ̆m bơ̆jang đei yua, hơtŏk tơiung pran tơring anih mơdro sa, kơmăy kơmŏk, pơvih pơvăn păng chă tơmang lăng vă pơm jên thu mong sơđơ̆ng, đunh đai ăn jên jang teh đak. Ưh khan lăp bơngơ̆t truh jên thu mong, lơ bơngai tang măt oei tơlĕch găh tơdrong klăih song jên jang vă kon pơlei, mă loi ‘noh jĭ kon pơlei đei ƀơm ưh kơ ‘lơ̆ng yua đơ̆ng dôm tơdrong jang đei iŏk yua rơđăh hloh đơ̆ng jơnei hơtŏk tơiung. Ƀok Võ Nam Thắng, Bí thư Đảng ủy phường Đông Ninh Hòa, dêh char Khánh Hòa akhan.

"Kăl kơ hơtŏk đei yua thu mong, tơlĕch jên jang, vei sơđơ̆ng tơlĕch ăn vei lăng sơđơ̆ng tơdrong hơrih sa tơpôl, mă kăl tơgŭm tơplih tơdrong jang, tơmơ̆t jên jang hơtŏk ‘lơ̆ng jang pơgang, pơtho pơhrăm tơ̆ tơring. Bơngai tăh hla ‘meh vă dôm tơdrong jơnei mŭk drăm âu đei klăih song, tơmơ̆t hơdai rơđăh ‘lơ̆ng lơ̆m dôm tơdrong jang tơgŭm vei sơđơ̆ng tơdrong hơrih sa tơpôl, mă loi ‘noh tơgŭm tơplih tơdrong jang, tơmơ̆t jên jang hơtŏk ‘lơ̆ng jang pơgang, pơtho pơhrăm tơ̆ tơring. Bơngai tăh hla ‘meh vă dôm jơnei mŭk drăm âu đei klăih song, tơmơ̆t hơdai rơđăh hloh lơ̆m dôm tơdrong jang tơgŭm vei sơđơ̆ng tơdrong hơrih sa tơpôl, kơttă ăn kon pơlei, mă loi ‘noh jĭ bơngai đei ƀơm ưh kơ ‘lơ̆ng yua đơ̆ng iŏk pơdreo  teh vă hơtŏk tơiung kơmăy kơmŏk, anih kơdrơ̆m.”

Hơdai hăm hơmĕng găh anih jang kăl păng tơdrong hiôk hơtŏk tơiung, kon pơlei ‘meh vă thu mong đơ̆ng teh gô đei tơmơ̆t jên jang lơ̆m hnam trưng hŏk, hnam pơgang, trong nơnăm, dơnâu mong đak, pơtho pơhrăm tơdrong jang, pơm tơdrong jang păng dôm tơdrong jang tơgŭm tơdrong jang sa đơ̆ng rŏng iŏk pơdreo teh, vă jơnei đei păr ang truh tơpôl.

Anih vei lăng kon pơlei dêh char Khánh Hòa tơbăt lơ̆m 6 khei hơtuch sơnăm, tơring hơdrin iŏk đei kơsô̆ tŏk GRDP tŏ sĕt tôch ai 11,2%, kiơ̆ đơ̆ng noh jang đang tơdrong hơgăt jang tŏk pơđĭ sơnăm đơ̆ng 10-11%. Vă bơ̆jang kiơ̆ ‘lơ̆ng tơdrong hơgăt âu, dêh char gô akŏm tŭn hrĕnh tơlĕch jên jang teh đak; hơmet pơ ‘lơ̆ng dôm tơdrong jang oei đei tam đang; hơtŏk iŏk yua 4 tơdrong jang tŏk; hơtŏk ‘lơ̆ng tơdrong bơ̆jang khŭl kơdră chĕp kơ̆l tơring 2 tăl; hơdai hăm tơgŭm hơdrol jên jang ăn dôm tơdrong jang tơgŭm vei lăng sơđơ̆ng tơdrong hơrih sa tơpôl păng dôm tơdrong jang kăl. Ƀok Châu Ngô Anh Nhân, Kơdră Anih vei lăng jên hu dêh char Khánh Hòa, tơbăt, tơring hơmet ăn klăih song jên hơtŏk thu mong jên jang sơnăm 2025 hăm jên hloh 10.000 ti hlak jên. ‘Nâu jĭ tơdrong ‘lơ̆ng gĭt kăl vă jang tŏk dôm khei hơtuch sơnăm.

“Jên jang âu gô đei klăih song ăn đĭ đăng rim xăh, phường vă pơm lăp hăm ‘meh vă tơmơ̆t jên jang dôm tơdrong jang kăl. Dêh char tơgŭm hơdrol tơmơ̆t jên jang ăn pơtho pơhrăm, jang pơgang pơyua ăn kon pơlei; hơdai hăm akŏm jên ăn dôm tơdrong jang tơm, mă loi ‘noh jĭ dôm tơdrong jang pơm tơdrong ‘lơ̆ng hơtŏk tơiung tơring păih pơbăh dêh char Khánh Hòa."

Dôm jơnei jang tŏk ‘lơ̆ng lơ̆m 6 khei hơtuch sơnăm ‘noh jĭ tơdrong ‘lơ̆ng gĭt kăl vă Khánh Hòa tŏk pran. Mă lei, vă hơtŏk tơiung kơjăp, dêh char kăl kơ tơplih ‘lơ̆ng kon jên jang đơ̆ng teh jing tơdrong ‘lơ̆ng đunh đai ăn pơm tơlĕch, tĕch mơdro păng vei sơđơ̆ng jơnei jang tŏk đei păr ang ‘lơ̆ng truh tơdrong hơrih sa kon pơlei.