Tơ̆ Hơnih Rong 'me linh rơka jĭ jăn Nghệ An, ƀok Trần Cẩm Tú hlôi năm hơpong păng asong tơmam ăn 83 'nu linh jĭ rơka; 18 'nhŏng oh kơ bơngai tơgŭm jơhngơ̆m ăn teh đak kơ 2 dêh char Nghệ An păng Hà Tĩnh. Tang măt ăn Kơdră Đảng, Teh đak, ƀok Trần Cẩm Tú pơtruh nơ̆r apinh jet gia pơma dơnuh, nơ̆r pôk bơnê păng đon bơnôh tơgĭt kăp gĭt truh hăm đe linh jĭ rơka, 'nhŏng oh bơngai tơgŭm jơhngơ̆m ăn teh đak tŏk bŏk oei đei vei lăng, rong 'me hơmet jĭ jăn tơ̆ ou.

Tơ̆ Hà Tĩnh, ƀok Trần Cẩm Tú păng khŭl kơpal hlôi truh plang pơkao, soh nhang ƀlŏk tơbăt tơ̆ Hơnih gru gra Ngã 3 Đồng Lộc, hơnih mă 10 'nu hơdruh xŭng phŏng Tiểu đội 4, Đại đội 552 hlôi nuih mơng lôch tang đơ̆ng rŏng kơ ayăt tơjruh ƀôm. Đe sư lôch hơchăng ƀơ̆t oei mơlôh, hlôi pơjing đei minh tơdrong ang bang nuih mơng ưh kơ layơ tôch kơ kon pơlei.