6 khei blŭng sơnăm 2026, khŭl Kŏng ang, Khŭl linh păng Ƀô̆ đô̆i vei sơlam teh dêh char Đăk Lăk hlôi kơchăng jang hơdoi vă băt hơdah tơdrong đei ƀôh, pơma đam, tơroi hơdah kơtơ̆ng ang, tơgŭm ăn rim jăl pơgơ̆r tơ̆ tơring tơtom hơmet dôm tơdrong đei ƀôh gah sơđơ̆ng chĭnh trĭ, sơđơ̆ng tơpôl hơrih xa, sơđơ̆ng tơpôl tơring sơlam; tơlĕch lơ trong jang vă vei lăng kơjăp tơdrong jang chĭnh trĭ kăp gĭt.

Pơtôch ah 'măng chă hơlen, Thiếu tướng Cao Đăng Hưng, Phŏ Kơdră Hơnih Pơvih ăn Hơnih tơm Kŏng ang pôk bơnê kơ tơdrong jang hơdoi đei jơnei kơ 3 khŭl jang; pơtruh nơ̆r pơtoi băt hơdah, jang tơnăp Tơchơ̆t kơsô̆ 03, kơchăng băt hơdah, tơroi đơ̆ng hrôih, đơ̆ng hơtaih, hơtŏk 'lơ̆ng tơdrong jang hơdoi, tơtom tơgŭm chă sek tơlang dôm tơdrong truh ưh kơ ê, ưh đei lê̆ tơhlăk tơhlĭn.