Lơ̆m 6 khei blŭng sơnăm, Jơnŭm pơgơ̆r kon pơlei jơ̆p tơring lơ̆m dêh char Đắk Lắk hlôi tơlĕch lơ tơdrong jang gĭt kăl ƀât mă ‘nao tơplih jăl jang, ‘nao hơmet mingkhul kơdră pơgơ̆r kiơ̆ trong Khul kơdră pơgơ̆r tơring 2 tăl. Jơnŭm pơgơ̆r kon pơlei dêh char hlôi pơgơ̆r 4 ‘măng hop akŏm, tơlĕch 46 tơdrong tơchơ̆t; tơdrong apinh jet kŭm đei tơplih ‘nao, akŏm găh dôm tơdrong đei bơngai tăh hla tơrek truh. Tơdrong tơƀâp bơngai tăh hla đei pơgơ̆r hơnơ̆ng, iŏk đei hlŏh 788 nơ̆r pơma, apinh vă ăn anih jang kơpal sek tơlang.

Tơ̆ xăh, Jơnŭm pơgơ̆r kon pơlei dôm tơring pơgơ̆r hlŏh 400 ‘măng hop akŏm, drơ̆ng nơ̆r ăn hlŏh 2.000 tơdrong tơchơ̆t; bơ̆ jang vă jê̆ 230 ‘măng dăr lăng kiơ̆ tơdrong jang păng 58 ‘măng dăr hơlen, vang tơgop hơmet pơ ‘lơ̆ng lơ pơmat tat ‘nao đei tơ̆ tơring.

Găh dôm tơdrong oei tơhlăk, lơ nơ̆r akhan, khul tang măt tơ̆ xăh oei tŏ sĕt, trong dăr hơlen, apinh jet păng vei lăng tam mă hrơ̆ch ‘lơ̆ng; tơdrong tơplih hăm kơmăy sô̆ păng tơmât yoa trong jang "hôp ưh đei hla ar" oei hiơ̆. Dôm bơngai tang măt oei athei hơtŏk tơdrong pơtâp pơhrăm tơdrong jang, hơmet pơ ‘lơ̆ng trong pơgơ̆r jang hơdoi đơ̆ng Jơnŭm pơgơ̆r kon pơlei hăm Anih vei lăng kon pơlei păng dôm anih bơ̆ jang, hơdai hăm ‘nŏh hơtŏk tơdrong tơmât yoa kơmăy kơmŏk roi tơbăt vă hơtŏk tơdrong đei yoa mưh bơ̆ jang đơ̆ng anih tang măt ăn kon pơlei.

Pơma pơtôch hop akŏm, yă Cao Thị Hòa An, Kơdră jang lơ̆m Trung ương Đảng, Phŏ Bí thư chĕp kơ̆l Đảng dêh char, Kơdră Jơnŭm pơgơ̆r kon pơlei dêh char Đắk Lắk, athei Jơnŭm pơgơ̆r kon pơlei jơ̆p tơring ‘moi kiơ̆ rim tơdrong đei tơ̆ tơring, mơ̆ng lăng nơ̆r pơma, tơdrong hơpơi ‘mĕh đơ̆ng kon pơlei vă tơtom roi tơƀôh, apinh hăm anih jang kơpal. Atŭm hăm ‘nŏh, hơtŏk tơdrong dăr lăng mưh jang kiơ̆ dôm tơdrongtơchơ̆t, dôm tơdrong jang gĭt kăl.

Yă Cao Thị Hoà An pơma hơdăh: “Hơnăp jang đơ̆ng Jơnŭm pơgơ̆r kon pơlei athei bơ̆ jang mă ‘lơ̆ng, hlôh vao hơdăh oei tơhlăk ƀât yơ vă roi tơƀôh ăn Đảng. Mă lei kŭm athei tơdrong vang tơgŭm đơ̆ng Anih vei lăng kon pơlei kiơ̆ đơ̆ng dôm tơdrong tơgŭm, kiơ̆ đơ̆ng dăr lăng vă sek tơlang đei tơdrong tơhlăk ‘nŏh. Hăm đei kăn ƀô̆ veh ver tơdrong jang dăh mă ưh? Hăm đei kăn ƀô̆ ưh pơ̆n tơchĕng, ưh pơ̆n jang ưh? Tơdrong jang đơ̆ng Jơnŭm pơgơ̆r kon pơlei jơ̆p tơring athei tơplih mă pran hlŏh dơ̆ng, vang bơ̆ jang, vang yak hơdoi ‘nŏh gơ̆h jang đang ‘lơ̆ng tơdrong jang."