Tơdrong jang “Oh ‘mêm teh đak Việt Nam” jĭ tơdrong jang gĭt kăl vă roi tơbăt, pơtho tơƀôh ăn đe đội viên, hơioh iĕ plt Hồ Chí Minh găh tơdrong arih, tơdrong jang kăch mang gơ̆h hơgei đơ̆ng Ƀok Hô; găh chăl arih, tơdrong jang ‘lơ̆ng hơiă đơ̆ng Khul hơioh Tiền phong Hồ Chí Minh, dôm hơioh gơ̆h hơgei. 

Pơma tơ̆ jơ tơƀâp, Phŏ Kơdră teh đak Võ Thị Ánh Xuân hơpơi ‘mĕh đe kon mon đội viên, hơioh iĕ rơgei đei 1 trong yak sơđơ̆ng ‘lơ̆ng, đei yoa chơt hơiă, vă rim jăl trong năm klĕch gô tơgŭm ăn đe mon hlôh vao hơdăh ƀiơ̆ găh chăl arih kơ hơdrĕch, tưk tơiung tơdrong ‘mêm kơ pơlei pơla, teh đak, vei rong đon lui, hưch hanh păng đon tơnăp hăm teh đak Việt Nam.

Phŏ Kơdră teh đak pơma hơdăh, Đảng păng teh đak hơnơ̆ng ‘măn lơ tơdrong tơrek gĭt kăl hăm hơioh, pơjing tơdrong ‘lơ̆ng vă rim hơioh đei hŏk, pơtâp pơhrăm, tih vơ̆ đjơ̆ ‘lơ̆ng lơ̆m anih hiôk sơđơ̆ng, ‘lơ̆ng hơiă păng tưk tơiung ‘lơ̆ng dôm tơdrong rơgei đơ̆ng kơdih. Phŏ Kơdră teh đak hơpơi 'mĕh rim khul chĕp kơ̆l Đảng, khul kơdră tơring, Mặt trận Tổ quốc, dôm khul jang chinh trĭ, tơpôl, anih pơtho pơhrăm, Khul druh dăm păng Khul hơioh Tiền phong Hồ Chí Minh hơnơ̆ng pơngơ̆t hlŏh dơ̆ng truh tơdrong jang vei lăng năng tông păng pơtho tơƀôh ăn đe hơioh.