Tang măt khŭl kơdră chĕp kơ̆l Đảng păng teh đak, Tổng Bí thư, Kơdră teh đak Tô Lâm hlôi pơjao tơmam hơpăh kăp gĭt ăn khŭl lĭnh vei lăng sơđơ̆ng kon pơlei vă chih iŏk dôm tơdrong plang pơyơ̆r tôch kơ hơgei lơ̆m tơdrong jang vei lăng sơđơ̆ng teh đak.

Pơma pơgơ̆r tơ̆ jơ pơm lêh, bơngai chĕp kơ̆l Đảng păng teh đak pơma hơdăh, lơ̆m khei ‘năr tơdrong ‘nao, khŭl lĭnh vei lăng sơđơ̆ng kon pơlei athei hơnơ̆ng tơplih ‘nao đon tơchĕng, hơtŏk ‘lơ̆ng tơdrong jang tơdra hơdrol gĭt kăl, kơchăng phă hŭt rim tơdrong tơchĕng vă phă ngơ̆r đơ̆ng khŭl kơ nê̆. Tổng Bí thư, Kơdră teh đak athei akŏm pơjing khŭl lĭnh mă rơgoh, pran kơjăp, gơh hơgei, ‘nao, tơgăl jing hla găn kơjăp vei lăng Đảng, teh đak păng tơdrong hơrih sa sơđơ̆ng kơ kon pơlei.