58 unh hnam công an rơgei đei pôk pơ ư, dơ̆ng tang ăn kơhrĕng rơbâu unh hnam lơ̆m khul linh Công an kon pơlei. Rim unh hnam đei tơdrong arih xa, tơdrong tơroi pha ra băl mă lei tơƀâp băl tơ̆ 1 anih ‘nŏh jĭ tơdrong chu plang pơyơ̆r, tơgŭm băl păng jing anih gơnang kơjăp ‘lơ̆ng vă đe kăn ƀô̆, linh yak hlŏh pơmat tat, jang đang ‘lơ̆ng tơdrong jang.

Nhen thoi unh hnam Trung tá Cù Thị Thu Hà, Anih kanh săr dăr hơlen tơdrong yoch ma túy, Công an dêh char Phú Thọ. Găh rŏng drŏ kăn pơm yŏng âu jĭ bơngai klo iŏk jang đĭ tơdrong jang lơ̆m hnam, jing bơngai gơnang tôch hơđơ̆ng lê̆ hơkăn sư sơđơ̆ng jơhngâm bơ̆ jang. 'Nhŏng Nguyễn Minh Luân, klo Trung tá Cù Thị Thu Hà, tơroi: “Tơdrong jang đơ̆ng Anih kanh sat dăr hơlen tơdrong yoch ma tuý tôch hơmơt, gleh hrat. Đei lơ năr hơkăn inh năm jang đơ̆ng hrôih, truh kơmăng tam mă ƀôh brŏk, krao điên thoăi ‘nŏh ưh gơ̆h. Mưh dôm ‘măng thoi noh, inh pôm băt gô chang păng hơpơi tơdrong ‘lơ̆ng truh đĕch. Băt hơdăh tơdrong jang đơ̆ng hơkăn kơna inh păng hnam nhôn hơnơ̆ng yak hơdoi vă hơkăn inh hơđơ̆ng jơhngâm bơ̆ jang”.

Pơma nơ̆r pơtho tơ̆ âu, Thượng tướng Lê Quốc Hùng, Kơdră jang lơ̆m Trung ương đảng, Phŏ Kơdră tơm vei lăng Công an pơma hơdăh, hăm khul linh công an kon pơlei, unh hnam jĭ anih gơnang tôch hơđơ̆ng, hơnơ̆ng tơiung dơ̆ng jơhngâm pran vă rim đe linh yak hlŏh pơmat tat, vei kơjăp nơ̆r hơngăh yoa tơdrong jang vei lăng sơđơ̆ng ăn teh đak. Găh rŏng dôm tơdrong jơnei ‘lơ̆ng hơiă hơnơ̆ng đei tơdrong vang yak hơdoi, chu iŏk jang rim tơdrong đơ̆ng mĕ ƀă, đơ̆ng klo kăn păng kon hơ ‘lơ̆p lơ̆m rim unh hnam.

Vă tơdrong jang lơ̆m hnam păng pơvih ăn công an roi đunh roi ‘lơ̆ng, Phŏ Kơdră Lê Quốc Hùng athei rim khul chĕp kơ̆l đảng, kơdră chĕp kơ̆l anih jang tơplih ‘nao đon tơchĕng, vei lăng ‘lơ̆ng tơdrong arih xa găh jơhngâm đon păng tơmam drăm ăn đe kăn ƀô̆, linh, mă loi jĭ dôm bơngai bơ̆ jang tơ̆ tơring hơtăih yăih, tơring sơlam dăh mă dôm tơdrong jang hrĕp ‘lơ̆ng. Atŭm hăm ‘nŏh dôm khul tơpôl athei vei lăng ‘lơ̆ng dôm tơdrong jang tơgŭm nhen "Kon rong Công an xăh" dăh mă "Mĕ hơđơ̆ng".

Phŏ Kơdră Lê Quốc Hùng hơpơi ‘mĕh rim unh hnam hơnơ̆ng hơtŏk tơdrong juăt, pơtho tơƀôh ăn kon hơ ‘lơ̆p arih xa ‘lơ̆ng, vang pơjing khul linh công an roi đunh roi pran kơjăp lơ̆m chăl jang tŏk ‘nao kơ teh đak: “Inh lui thoi âu, hăm tơdrong juăt kơtang nuih mơng, ƀĕnh jơhngâm đon ‘mêm băt đơ̆ng khul linh công an kon pơlei, hăm tơdrong vang yak hơdoi đơ̆ng rim unh hnam păng đon adrin đơ̆ng đĭ đăng tơpôl, rim kăn ƀô̆, linh Công an kon pơlei jang găh rim tơdrong gô đei dơ̆ng nơ̆r pơlung, plang pơyơ̆r vă gơ̆h jang đang ‘lơ̆ng tơdrong jang, vang tơgop pơjing khul linh Công an kon pơlei pơjei băl bơ̆jang “Roi tơnăp”, “Mĭng jơhngâm đon” păng “jê̆ kon pơlei”, yoa tơdrong arih xa hiôk sơđơ̆ng, 'lơ̆ng rŏ kơ kon pơlei”./.