Tang măt ăn Kơdră chĕp kơ̆l Đảng păng teh đak, Thủ tướng hôn bơnê jơhngâm đon jang tơnăp, nuih mơng, ưh hli tơdrong krê hơmơt păng tŏ ‘mi kial kơnê̆ đơ̆ng đe kăn ƀô̆, linh lơ̆m khei ‘năr bơ̆ jang tơdrong jang lơ̆m apŭng plenh teh.

Bơngai chĕp kơ̆l Khul kơdră teh đak pơma hơdăh, dôm tơdrong jang đei đơ̆ng Khul ưh lăp tơƀôh hơdăh tơdrong jang rơgei đơ̆ng khul jang dŏng tơgŭm kơ Việt Nam đĕch, mă oei tơpăr nơ̆r tơbăt kơ 1 teh đak Việt Nam pran kơtang, băt ‘mêm mơnat, đei đon jang tơnăp hăm tơpôl lơ̆m apŭng plenh teh. Thủ tướng athei dôm anih tơm, anih jang kơpal hơnơ̆ng tơrek, bơ̆ jang ‘lơ̆ng tơdrong tơgŭm, atŭm hăm ‘nŏh pơjing tơdrong ‘lơ̆ng hlŏh vă khul jang dŏng tơgŭm bơ̆ jang roi đunh roi rơgei, kơchăng tơjră hăm rim tơdrong kơnê̆.