Thủ tướng teh đak Lê Minh Hưng pơma hơdăh, nơ̆r pơma tôch gĭt kăl, đĭ jơhngơ̆m đon păng tôm tong đơ̆ng ƀok Tổng Bí thư, Kơdră chĕp pơgơ̆r Teh đak tơpă jing nơ̆r hơlêm, pơtrut tih tên păng jing jơhngơ̆m đon pơchoh ăn tôch trŏ lăp ăn Khul kơdră chĕp pơgơ̆r Teh đak, rim kâp, rim hơnih jang, rim tơring vă hơnơ̆ng hơdrin kơtang, kơrŭn đĭ ai jang kiơ̆ ‘lơ̆ng hloh dơ̆ng tơdrong jang đei pơjao, jang keh đang ‘lơ̆ng rim trong tơlĕch ăn atŏk tơ iung mŭk ldrăm-tơpôl sơnăm 2026 păng pơđĭ jăl jang 2026-2030.

Pơma hơdăh kơrŭn đĭ ai iung jang tŏk mŭk dram sơnăm 2026 păng jăl jang 2026-2030 iŏk đei ƀar kơsô̆, atŭm hăm vei kơjăp sơđơ̆ng mŭk dram, vei lăng kĕ kơjă tŏk jur păng sơđơ̆ng hơmet pơ ‘lơ̆ng tơdrong jang mŭk drăm, Thủ tướng Teh đak Lê Minh Hưng athei:"Hơnih jang ayơ, tơring ayơ hlôi jang keh đang păng keh đang hloh trong tơlĕch ăn tŏk mŭk dram lơ̆m 6 khei blŭng sơnăm ‘noh hơnơ̆ng hơdrin hloh dơ̆ng vă iŏk đei jơnei kơtang hloh dơ̆ng. Rim hơnih jang, rim tơring tim mă iŏk đei jơnei ‘noh kăl hơdrin iung jang mă keh đang, mă kăl ‘noh Hơnih tơm Hà Nội păng Pơlei tơm Hồ Chí Minh atŭm hăm rim tơring vang tŏk kơtang. Hrei ou 25 lơ̆m 34 dêh char kăl hơdrin kơtang hloh dơ̆ng. trong tơlĕch ăn đơ̆ng Khul kơdră Teh đak hlôi pơjao tơdrong jang tôch hơdăh ăn rim hơnih jang, rim tơring, athei rim hơnih tơm, hơnih bơ̆jang păng mă kăl ‘noh rim dêh char, pơlei tơm găh Trung ương lăng tông kơtang păng tơlĕch jang kiơ̆ trong hlôi pơchoh ăn, trong jang chĕp pơgơ̆r đơ̆ng Khul kơdră chĕp pơgơ̆r Teh đak."

Dôm trong pơrô̆ jang đơ̆ng bơngai chĕp kơ̆l Khul kơdră chĕp pơgơ̆r Teh đak tơƀôh hơdăh Khul kơdră chĕp pơ̆r Teh đak oei tim mă lăp đon hăm tơdrong iŏk đei jơnei ‘măng mă blŭng. Mă kăl ‘noh Hơnih tơm Hà Nội păng Pơlei tơm Hồ Chí Minh, ƀar hơnih kơdrơ̆m tih hloh ou tơmơ̆t iŏk đei tôch kơ lơ lơ̆m GDP kơ lơ̆m teh đak. Tơdăh ƀar "hơnih tơm" ou ưh kơ tŏk kơtang, tơdrong jang mŭk dram tơnap mă iŏk đei jơnei trŏ lăp hăm trong tơlĕch ăn. "Rim hơnih jang, rim tơring tim mă iŏk đei jơnei trong tơlĕch ăn tŏk muk dram 2 kơsô̆ lei kăl hơdrin jang mă keh đang”, ‘nou jĭ mĭnh nơ̆r athei tôch hơdăh, kăl iung jang mă kơtang, ưh kơ veh ver hơnăp jang đơ̆ng rim hơnih bơ̆jang tŏk bŏk iung jang hiơ hiơ̆. "Hrei ou 25 lơ̆m 34 dêh char kăl hơdrin kơtang hloh dơ̆ng”, kơsô̆ ou tơƀôh hơdăh tơdrong iung jang keh đang trong tơlĕch ăn jĭ oei tih tên, tơƀôh hơdăh dôm tơdrong yan ou lơ lou, tơdrong jang mŭk dram mă đơ̆ng hlôi iŏk đei jơnei hơ iă mă lei tim mă hơtŏ, lei lăi dih băl, kăl iung jang đĭ ai hloh dơ̆ng vă iŏk đei jơnei trong tơlĕch jang tŏk mŭk dram 2 kơsô̆ lơ̆m sơnăm 2026 păng pơđĭ lơ̆m jăl jang 2026-2031.