Đơ̆ng rŏng đei tơdrong lôch glơ̆k tôch mơnat đơ̆ng 5 ‘nu oh drŏ kăn pơtơm vă mât hŏk lăm 6 ƀât đe oh chông băl jur hum ngôi tơ̆ dơnâu Đắk Pot păng ưh pŭn pŭh tơ̆ anih đak jrŭ. Tơdrong lôch glơ̆k đei lơ̆m khei ‘năr đe oh hŏk tro ‘nao pơdơ̆h he, hơdai hăm pơyan ‘mi truh, đak tih tơ̆ dôm đak krong, dơnâu đak tŏk, đak ro jăng tôch hơmơt. Tơdrong ‘nâu ăn ƀôh đon vei lăng năng tông đe hơioh đơ̆ng unh hnam păng tơpôl tam mă kơjăp ‘lơ̆ng lơ̆m dôm khei hŏk tro pơdơ̆h hŏk tơ̆ hnam trưng.

Tơ̆ hơnăp tơdrong krê hơmơt âu, ‘năr 9/7/2026, Anih vei lăng kon pơlei dêh char Lâm Đồng hlôi tơlĕch hla ar chih athei rim anih jang chinh trĭ vang bơ̆ jang vă găn ƀiơ̆ dôm tơdrong ơh sơ ‘ngon thoi âu. Kiơ̆ kơ ‘nŏh, Anih vei lăng pơtho pơhrăm athei hơtŏk tơdrong jang hơdoi hăm unh hnam vă vei lăng hŏk tro pơyan he, hơtŏk tơdrong pơtho glơi ăn đe oh.

Anih vei lăng jŏh ayŏ kơ dŏ xoang, tơplŏng kơdâu hơtŏk tơdrong hơlen năng tơdrong sơđơ̆ng tơ̆ rim sơlŭng đak hum glơi, anih ngôi pơchơt; anih jang pơgang hơtŏk kơsư̆k dŏng hơmet kơtă tơ̆ tơring. Hơdai hăm ‘nŏh, dôm khul jang kơpal chĭu pŭ hơnăp jang vei lăng đĭ đăng sơlung đak, dơnâu đak vă var hơmet jŭm dăr, hơtâp kơƀang roi tơbăt tơdrong krê hơmơt.

Mă loi, Anih vei lăng kon pơlei dêh char Lâm Đồng pơma hơdăh, Kơdră vei lăng kon pơlei dôm xăh, phường athei chĭu pŭ đĭ đăng tơ̆ hơnăp Kơdră vei lăng kon pơlei dêh char tơdăh lê̆ đei tơdrong hơioh lôch glơ̆k tơ̆ tơring kơdih vei lăng.

Nơ̆r pơtho tơƀôh tôch kơtang đơ̆ng Khul kơdră tơring hlôi đei, mă lei vă huei pơă đei đak măt ơh sơ ‘ngon lĕch, rim unh hnam athei hơtŏk đon kơchăng. Athei ‘măn jơnăr vei lăng năng tông, pơtho tơƀôh ăn kon hơ ‘lơ̆p, ưh gơ̆h lê̆ đe oh jur hum tơ̆ đak krong, dơnâu đak mă ưh đei bơngai ‘lŏ vei lăng. Vei lăng đe hơioh tơ̆ hơnăp dôm tơdrong krê hơmơt glơ̆k tơ̆ đak lơ̆m pơyan he ưh kơsĭ hơnăp jang đơ̆ng 1 ‘nu bơngai hơyơ ‘nŏh đĕch, mă ‘nâu jĭ hơnăp jang đơ̆ng đĭ đăng tơpôl./.