Đơ̆ng rŏng kơ hơmet ming dôm anih jang vei lăng tơ̆ dêh char, Khánh Hòa pơih xă anih jang tŏk hăm hlŏh 8.700 km² teh tơ̆ kông, 65 anih jang vei lăng tơ̆ xăh kŭm hăm tơring đak dơsĭ tôch xă. Proh hơmet trong jang đei pơjing tôch kơjăp, 'moi kiơ̆ Luơ̆t Tơproh trong jang sơnăm 2025 păng hơnơ̆ng chih iŏk tôm nơ̆r pơma đơ̆ng dôm anih tơm, anih jang kơpal kơ Trung ương kŭm hăm kon pơlei.

Kiơ̆ tơdrong tơproh trong jang, Khánh Hòa adrin vă gơ̆h jing anih tơƀưh tơring tơter đak dơsĭ Nam Trung Bộ păng Tây Nguyên, iŏk Nha Trang - Đà Lạt pơm tơm vă pơjing anih jang hơdoi tơguăt “Đak dơsĭ – Groi kông”. Trong jang tŏk đơ̆ng Khánh Hòa đei chih hơdăh kiơ̆ trong: “1 trong jang atŭm – 2 anih tơƀưh - 3 pang jang tŏk - 4 tŏ jrăng tơjră”. Lơ̆m noh, 4 tŏ jrăng tơjră vă jang tŏk đơ̆ng Khánh Hòa đei: chă tơmang lăng ‘lơ̆ng; tơplih ‘nao rơgei păng pơvih hăm kơmăy sô̆; jang kơmăy pơm tơmam đơ̆ng ka hơdang; kơmăy kơmŏk ‘nao…

Tơblang hơdăh ƀiơ̆ găh trong vă jang ‘nâu, ƀok Châu Ngô Anh Nhân, Kơdră Anih vei lăng jên hu dêh char Khánh Hòa ăn tơbăt: “Găh unh hơyuh, akŏm jơhngâm atŏk tơiung dôm kơloăi unh hơyuh ‘nao, unh hơyuh rơgoh, lơ̆m noh, đei unh hơyuh hat nhân tơ̆ găh Pơbăh dêh char Khánh Hòa. Găh trong jang tŏk tơring kơdrâm, tơring tơrang, adrol kơ sơnăm 2030, dêh char Khánh Hòa jing plt găh Trung ương, pơjing đei 21 tơring kơdrâm, lơ̆m noh đei 5 tơring kơdrâm kơloăi 2 păng adrin jang tŏk jing tơring kơdrâm kơloăi 2 păng 16 tơring kơdrâm kơloăi 3”.

Găh trong vă jang truh sơnăm 2050, Khánh Hòa adrin jing tơring jang mŭk drăm đak dơsĭ tih kơ teh đak, jang tŏk rơgŏh ‘lơ̆ng păng dang ăi hăm tơring châu Á. Pơma tơ̆ hop akŏm, Kơdră vei lăng kon pơlei dêh char Khánh Hòa Nguyễn Việt Hùng pơma hơdăh, tơdrong roi tơbăt trong Tơproh jang ưh khan vă găn tôch mă vă pơih trong blŭng a ăn 1 chă jang tŏk ‘nao. Tơdrong jơnei athei năng kiơ̆ dôm tơdrong đei yoa păng tơdrong tơplih ‘lơ̆ng lơ̆m tơdrong arih xa kơ kon pơlei. Dêh char Khánh Hòa pơkăp vă jang tŏk hrĕnh mă lei kơjăp, khŏm ưh đei tơplih hŭt cham char, tơmam drăm păng anih gru groa vă jang tŏk ƀât măt dang ei.

Vă pơjing đei đon lui ăn bơngai tơmât jên jang, Kơdră vei lăng kon pơlei dêh char Khánh Hòa Nguyễn Việt Hùng pơma hơdăh: “Hơnơ̆ng akŏm jơhngâm hơmet pơ ‘lơ̆ng dôm tơdrong tơhlăk găn trong jang tŏk, mă loi ‘nŏh dôm tơdrong tơproh trong jang, chĕng hơmet teh, tơlĕch jên jang, chưk pơ ‘ngoăih teh păng pơm hla ar vei lăng. Tơproh trong jang vă pơih đei anih jang tŏk roi pran. Tơdrong jang đơ̆ng bơ̆n ‘nŏh athei bơ̆ jang  tơdrong ‘nŏh, hăm khul tĕch mơdro, dôm bơngai tơmât jên jang inh hơpơi ‘mĕh iĕm hơlen năng trong tơproh jang âu vă gơ̆h sơđơ̆ng jơhngâm tơmât jên jang xa đunh đai tơ̆ Khánh Hòa”./.