Tơ̆ lêh tơbăt, Tổng Bí thư, Kơdră teh đak Tô Lâm pơma hơdăh, pơma truh pơlei tơm Hồ Chí Minh ‘noh jĭ pơma truh 1 tơring teh ƀĕnh tơdrong joăt joe ‘mêm kơ teh đak, kach mang, băt ‘mêm păng hơgei; 1 tơring teh ling lang akŏm dôm kơjă kăp gĭt ‘lơ̆ng hơiă kơ hơdrĕch hơdrŭng, hơdai hăm ưh kơ đei pơdơh pơih trong ăn dôm tơdrong hơpơi ‘meh ‘nao. Pơlei tơm hlôi tơƀôh hơdăh hơnăp jang tơm mŭk drăm, hơnih jang tih găh jên hu, tĕch mơdro, pơvih pơvăn, khoa hŏk - kơmăy kơmŏk, pơtho pơhrăm, jang pơgang, joh ayŏ, tơbôl păng mơ̆t jang hơdai apŭng plĕnh teh.

Tổng Bí thư, Kơdră teh đak Tô Lâm athei, pơlei tơm tơproh trong jang hơnih hơtŏk tơiung kiơ̆ trong lơ anih jang, ‘nao, rơgoh, hơgei, tơgoăt kơjăp hăm tơring Hơlĕch Pơbăh, tơmăn đak krong Cửu Long, Tây Nguyên, pơđĭ lơ̆m teh đak păng apŭng plĕnh teh. Hơdai hăm ‘noh, anih jang athei năm hơdrol 1 hơyak, mă lei athei đei tơm, kăl, vei sơđơ̆ng đei yua tơmơ̆t jên jang, tơgŭm hơdrol trong nơnăm tơpôl, trong gre treng anih kơdrơ̆m, trong ver, trong gre kơdâu hrĕnh, tơnŏk đak dơsĭ, logistics, kơmăy kơsô̆, ŭnh hơyuh, jang pơgang, pơtho pơhrăm, joh ayŏ, hnam oei tơpôl, tang găn đak lơ̆p păng hơnih rơgoh.