6 khei blŭng sơnăm, akŏm tơmam mŭk drăm kơ Đắk Lắk jô̆ pơhlom tŏk 8%; iŏk yua tơmang lăng tŏk hloh 37%; đei hloh 1.990 anih mơdro sa pơjing ‘nao. Hop akŏm Tơbăt hơdăh tơdrong Tơproh trong jang păng Pơtrŭt tơmơ̆t jên jang dêh char Đắk Lắk sơng đei 103 bơngai tơmơ̆t jên jang chih măt tơlĕch jang 147 tơdrong jang hăm akŏm jên tơchĕng hơdrol hloh 1 triệu ti hlak jên; 25 tơdrong jang, akŏm jên 40.290 ti hlak jên hlôi đei drơ̆ng ăn trong jang tơmơ̆t jên jang.

Pơgơ̆r hop akŏm, ƀok Lương Nguyễn Minh Triết, Bí thư Anih jang Đảng dêh char Đắk Lắk athei rim kơdră, rim anih jang akŏm rim kon jên bơ̆jang kiơ̆ tơdrong hơgăt jang tŏk đơ̆ng 10% tơ̆ kơpal lơ̆m sơnăm 2026; hơtŏk ‘lơ̆ng đei yua tơdrong jang đơ̆ng khŭl kơdră tơring 2 tăl; tŭn pran hơmet ming bơ̆jang, tơplih kơsô̆, hơmet pơ ‘lơ̆ng mơmat tat ăn anih mơdro sa, tŭn hrĕnh dôm tơdrong jang tơm păng vei kơhret ki luơ̆t, bơ̆ jang tơpăt, tơklep hơnăp jang bơngai chĕp kơ̆l hăm iŏk yua bơ̆jang kiơ̆ hơnăp jang.