Kiơ̆ tơbăt, 6 khei blŭng sơnăm, dêh char Đắk Lắk hlôi tơlĕch jang kơtang rim trong bơ̆ jang đơ̆ng Đảng, khôi luơ̆t Teh đak găh vei lăng sơđơ̆ng teh đak, bơ̆ jang vei lăng sơlam teh đak; tơtom tơlĕch iung jang kiơ̆ kơjăp, trong pơprŏ jang trŏ lăp hăm tơring.

Kiơ̆ đơ̆ng Đại tá Lê Văn Hùng, Kơ iĕng Kơdră chĕp pơgơ̆r Hơnih, Kơdră pơchoh trong tơm găh Khul kơdră chĕp pơgơ̆r Ƀô̆ đô̆i dêh char Đắk Lắk, dêh char hlôi tơgoăt kơjăp tơdrong atok tơ iung mŭk drăm - tơpôl hăm hơmet pơ ‘lơ̆ng vei lăng sơđơ̆ng dơ̆ng kơjăp tơring. Rim hơnih đei ƀơm truh hlôi iung jang hơdoi lơ̆m hơlen rim trong pơprŏ jang, trong vă jang vă mĭnh păh trŏ lăp hăm tơdrong ‘meh vă atŏk tơ iung, adoi sơđơ̆ng vei lăng sơđơ̆ng dơ̆ng kơjăp. Dêh char jei jang kiơ̆ jơnei rim trong jang tang găn dăng rôp ka hơdang glăi (IUU), vei lăng kơjăp khul jang, duk kơchăng iung jang vei lăng sơđơ̆ng pơm tơ-‘ngla đak dơsĭ, achon dơsĭ; atŏk kơtang chĕp pơgơ̆r, vei lăng pơm tơ-‘ngla sơlam teh đak, iung jang hơdoi jang jơnei bơ̆ jang chĕng hơdrar, hơtơ̆p hơdrơ̆ng hơdrar hăm teh đak boăl Campuchia.

Khul dân quân tự vệ hăm khul hmŏ hơnơ̆ng đei atok tơ iung kơtang. Bơ̆ jang krao tơmơ̆t pơm ƀô̆ đô̆i đei bơ̆ jang kơjăp, tơpăt rơhao, keh đang 100% trong tơlĕch jang hăm vă jê̆ 5.500 ‘nu kon pơlei mơ̆t pơm ƀô̆ đô̆i. Rim khul Ƀô̆ đô̆i, Kŏng ang păng Ƀô̆ đô̆i vei lăng sơlam teh đak vei kơjăp iung jang hơdoi kơjăp lơ̆m vei lăng sơđơ̆ng chinh trĭ, sơđơ̆ng dơ̆ng kơjăp tơpôl, vei lăng rim tơdrong pơgơ̆r chinh trĭ gĭt kăl, adoi iung jang kiơ̆ ‘lơ̆ng hơnăp jang tơm dơnơm lơ̆m tang găn ‘mi kial pơrăm, tơchă dŏng. Đại tá Lê Văn Hùng tơbăt, rim hơnih jang, khul ƀô̆ đô̆i, kŏng ang dêh char Đắk Lắk hlôi tơ iung pơjing tôm tong trong pơprŏ jang, trong iung jang tơblăh, kơchăng iung tơblăh:“Rim hơnih jang, khul ƀô̆ đô̆i, kŏng ang dêh char Đắk Lắk hlôi tơ iung pơjing tôm tong trong pơprŏ jang, trong iung jang tơblăh, kơchăng iung tơblăh; tơtom hơmet ming, tơmơ̆t dơ̆ng trŏ lăp hăm tơdrong yan ou, tơdrong jang păng hơmet ming khul jang mưh jang kiơ̆ trong bơ̆ jang khul kơdră chĕp pơgơ̆r tơring 2 kâp; hơnơ̆ng pơgơ̆r pơtho pơhrăm tơblăh, iung jang kiơ̆ tôm tong rim trong vă jang, kơchăng kơtang hơmet pơ ‘lơ̆ng tơtom, jơnei rim tơdrong đei ƀôh ưh sơđơ̆ng. Tơlĕch jang kiơ̆ trong pơprŏ iung tơblăh "Pơbŭng tang găn rơvơ̆ng plĕnh kơjăp iăp kơtang” vă tơ iung pơjing bơ̆ jang pran kơtang lơ̆m tang găn hơlou rơvơ̆ng plĕnh jơ̆p jang, lơ tăl, kơjăp; roi năr roi keh đang trong jang iung tơblăh tang găn gre păr ưh kơ đei bơngai vơ̆r.”

Ƀok Đào Mỹ, Kơ iĕng Kơdră chĕp pơgơ̆r Hơnih vei lăng kon pơlei dêh char Đắk Lắk tơbăt, 6 khei hơtuch sơnăm 2026, bơ̆ jang khul ƀô̆ đô̆i, vei lăng sơđơ̆ng tơring păng bơ̆ jang vei lăng sơđơ̆ng sơlam teh đak oei đei lơ tơdrong kăl. Ƀok Đào Mỹ athei rim hơnih jang, khul ƀô̆ đô̆i kŏng ang hơnơ̆ng tơlĕch jang kiơ̆ jơnei trong bơ̆ jang đơ̆ng Đảng, Khôi luơ̆t Teh đak; atŏk kơtang chĕp pơgơ̆r, vei lăng sơlam teh đak; vei lăng kơjăp khul jang, duk, gre kmăi kmŏk kon pơlei, kơchăng kơtang hơvơn iung jang vei lăng pơm tơ-‘ngla đak dơsĭ, achon dơsĭ; tơlĕch jang kiơ̆ kơtang rim trong jang tang găn dăng rôp ka hơdang glăi (IUU); adoi vei kơjăp trong jang kơchăng iung tơblăh, pơm hơtŏk kơtang pơtho pơhrăm, trŏ lăp ăn tơdrong jang lơ̆m chăl hle.“Lăng ba kơjăp tơ iung pơjing khul ƀô̆ đô̆i păng hơnih bơ̆ jang ƀô̆ đô̆i kŏng ang tơring pran kơjăp iăp kơtang tôm tong, trŏ lăp ăn tơdrong jang lơ̆m chăl hle. Vei kơjăp ‘lơ̆ng bơ̆ jang kơchăng iung tơblăh sơđơ̆ng kơtang pơtho pơhrăm, tơdrong iung jang hơdoi ƀar păh 3 khul kiơ̆ tơdrong pơkăp, kiơ̆ Tơchơ̆t 03 sơnăm 2019 đơ̆ng Khul kơdră Teh đak.”

Ƀlep lơ̆m jơ ‘năr ou, đei Hơnih tơm Ƀô̆ đô̆i vei lăng sơlam teh đak, Quân khu 5 pơjao, ƀok Đào Mỹ, Kơ iĕng Kơdră chĕp pơgơ̆r Hơnih vei lăng kon pơlei dêh char Đắk Lắk hlôi pôk ăn Hla bơar Pôk bơnê đơ̆ng Hơnih tơm Ƀô̆ đô̆i vei lăng sơlam teh đak pôk ăn 1 ‘nu bơngai; pơjao Hla bơar pôk bơnê đơ̆ng Quân khu 5 ăn 2 khul, 7 ‘nu bơngai bơ̆ jang ‘lơ̆ng lơ̆m tơlĕch jang kiơ̆ rim tơdrong jang khul ƀô̆ đô̆i, vei lăng sơđơ̆ng teh đak 6 khei blŭng sơnăm 2026.