Kiơ̆ dôm bơngai juăt jang, mă đơ̆ng đei lơ tơdrong ‘lơ̆ng, Đắk Lắk kŭm oei tơjră hăm lơ tơdrong nol nhen bri ‘long roi jur, tơdrong choh jang xa ưh đei kơjăp ‘lơ̆ng, tơdrong kơhret đơ̆ng tŏ ‘mi kial tơplih păng nơ̆r athei roi đunh roi tŏk kơjung đơ̆ng anih tĕch mơdro găh tơmam rơgoh ‘lơ̆ng, kăt tơjur ƀiơ̆ kơchơ̆t ‘mê̆ ‘mach.

Vă gơ̆h jang tŏk mŭk drăm rơgŏh ‘lơ̆ng, đei yoa, Đắk Lắk iŏk đei nơ̆r tơtă athei tơplih mă brĕ đơ̆ng iŏk yoa tơmam bri brăh jing jang tŏk hơdoi ‘lơ̆ng găh mŭk drăm hăm vei lăng tơmam bri brăh; akŏm jơhngâm ăn tơdrong choh jang xa rơgoh, jang mŭk drăm hơdai, jang kiơ̆ tín chỉ carbon, atŏk tơiung chă tơmang lăng lơ̆m tơpôl tơklep hăm vei kơjăp tơdrong joh ayŏ kơ dŏ xoang păng tơmam drăm đak dơsĭ, bri ‘long. Yă Đặng Thị Thủy, Phŏ Kơdră Anih vei lăng choh jang xa păng cham char Đắk Lắk ăn tơbăt, jang tŏk mŭk drăm rơgŏh ưh lăp trong vă jang đĕch mă oei jing tơdrong gĭt kăl vă Đắk Lắk năm truh tơdrong jang tŏk pran kơjăp.