Tơ̆ jơ sơng, Tổng Bí thư, Kơdră teh đak Tô Lâm pơma hơdăh, Đảng păng Teh đak Việt Nam adrol dăh mă đơ̆ng rŏng nhen mĭnh, hơnơ̆ng ‘măn tơdrong tơgŭm dêh hlŏh ăn tơdrong pơvei ‘lơ̆ng hơiă, “ưh kơ đei tơ̆ yơ” đơ̆ng Việt Nam - Lào, tơgŭm tôch pơneh ăn tơdrong jang tơplih ‘nao păng mât hơdoi hăm apŭng plenh teh đơ̆ng Lào, kơchăng tơgŭm tôch ai ăn Đảng, Teh đak păng kon pơlei Lào, roi tơbăt ăn băl dôm tơdrong kăl vă kŭm hăm băl yak hlŏh pơmat tat, pơlong nol, păng thơ thou ăn Khul đei ‘măng năm bơ̆ jang iŏk đei jơnei ‘lơ̆ng.

Tổng Bí thư, Kơdră teh đak pơma hơdăh, yak mât lơ̆m chăl ‘nao 2 păh athei bơ̆ jang mă ‘lơ̆ng, đei yoa dôm Hla ar pơkăp drơ̆ng nơ̆r jang hơdoi hlôi đei kĭ. Tổng Bí thư, Kơdră teh đak Tô Lâm lui, hăm rim tơdrong đei hơmet ‘lơ̆ng păng đon pơhnŏng chinh trĭ tôch pơneh, tơdrong pơvei Hà Nội - Viêng Chăn gô hơnơ̆ng tŏk pran, vang tơgop gĭt kăl ăn tơdrong jang tŏk đơ̆ng rim tơring, atŭm hăm ‘nŏh pơm pơ ‘lơ̆ng hlŏh dơ̆ng tơdrong pơvei ‘lơ̆ng hơiă, kăp gĭt đơ̆ng Việt Nam - Lào.