Pơgê hei (13/5), Hop akŏm bơngai tang măt lơ̆m teh đak kơ Anih MTTQ Việt Nam ‘măng mă XI, jăl jang đơ̆ng 2026-2031 hôp jơ hơtuch. Hop akŏm đei hơnăn: “Mât mĭnh ƀơ̆r đon –Kon pơlei pơm tơm – Tơplih ‘nao - Rơgei – Jang tŏk” hlôi pơma nuh, hơlen năng rơđăh rim tơdrong ƀơm truh kon pơlei păng tơdrong tơguăt đĭ đăng hơdrĕch hơdrung; tơdrong bơ̆ jang kiơ̆ tơdrong Tơchơ̆t, Tơdrong jang đơ̆ng MTTQ Việt Nam jăl X, đơ̆ng 2024-2026, drơ̆ng nơ̆r hăm trong jang, đon pơhnŏng, Tơdrong vă jang đơ̆ng MTTQ Việt Nam jăl jang đơ̆ng 2026-2031; hơmet ming, chih tơmât dơ̆ng Tơdrong hơgăt kơ MTTQ Việt Nam; pơma nuh drơ̆ng nơ̆r ăn Anih Trung ương MTTQ Việt Nam, Khul kơdră vei lăng, Đe kơdră chĕp kơ̆l, dôm kơchư̆k chĕp kơ̆l tơm kơ Anih Trung ương MTTQ Việt Nam jăl jang đơ̆ng 2026-2031.

Hop akŏm hlôi pơma nuh rơih đei 397 ‘nu bơngai jang lơ̆m Anih Trung ương MTTQ Việt Nam jăl XI, đơ̆ng 2026-2031 (ưh tôm 8 ‘nu, gô đei pôk rơih pơtôm ming dơ̆ng lơ̆m jăl jang mưh ƀôh bơngai jang lăp ‘lơ̆ng). Lơ̆m noh, bơngai so đei pôk hơtŏk dơ̆ng ‘nŏh 309 ‘nu (iŏk đei 77,8%), rơih ‘nao đei 88 ‘nu (iŏk đei 22,2%). Đơ̆ng rŏng kơ pơgơ̆r pơma nuh rơih bơngai jang lơ̆m Anih Trung ương MTTQ Việt Nam jăl XI, đơ̆ng 2026-2031, Anih Trung ương MTTQ Việt Nam jăl XI hlôi pơgơ̆r hop akom ‘măng mă 1. Kiơ̆ kơ ‘nŏh, tơ̆ jơ hôp mă hơtuch, Khul kơdră pơgơ̆r Hop akŏm roi tơbăt dôm tơdrong iŏk đei đơ̆ng Hop akŏm Anih Trung ương MTTQ Việt Nam ‘măng mă mônh, jăl XI păng roi tơbăt Khul kơdră vei lăng Anih Trung ương MTTQ Việt Nam jăl XI.