Ƀôh hơdăh ‘noh jĭ tơ̆ Trong gre tih 20, tơ̆ kông krang D'ran tơƀưh Đà Lạt hăm Phan Rang, truh dang ei đĭ hloh 6 khei đơ̆ng rŏng kơ hơlih 60.000m3 teh tơmo tơdrong pơm hơmet ‘lơ̆ng oei tam mă kĕ đang. Tơ̆ hơnih teh hơlih, anih jang kơpal oei ưh kơ ăn gre tih hloh 5 tấn kơdâu vih vơ̆t rok gơng.

Lơ̆m kơplăh ‘noh, tơ̆ kông krang Prenn ‘măng mơ̆t lĕch păih Pơbăh hơnih kơdrơ̆m Đà Lạt, mă đơ̆ng đĭ pơm hơmet đang hơnih teh hơlih pơm kơtĕch trong mă lei oei lơ hơnih tơ̆ jih trong đei ƀôh krê hơmơt teh hơlih pơm tơhlăk trong ưh kơ gơh yak vih vơ̆t kăl kơ đei hơmet ming pơ ‘lơ̆ng hơdrol kơ pơyan ‘mi. Ƀok Nguyễn Thanh Long, Phŏ Kơdră Anih vei lăng Ming man dêh char Lâm Đồng tơbăt, tơdrong hơmet ming dôm hơnih teh hơlih păng hư răm trong nơnăm tơ̆ tơring oei hiơ̆ pơting hăm ‘meh vă tơpă yan âu.