Hơnơ̆ng mơ̆ng lăng tơdrong tơroi ƀơm truh trong jang tơmât hơdai păng kăt tơjur khul bơngai jang, đảng viên Nguyễn Văn Lập, tơ̆ xăh Hòa Thắng, plt Buôn Ma Thuột ƀôh ‘nâu jĭ tơdrong jang kăch mang ‘lơ ‘lŏ. Kơdih kâu ƀok păng lơ kon pơlei lui, tơdrong tơplih ‘nâu gô pơih đei tơdrong ‘lơ̆ng ăn tơdrong jang tŏk kơ teh đak ning mônh kơnh: “Tơdrong tơproh jang păng tơdrong vă jang tŏk mŭk drăm gô pơih xă ƀiơ̆, pơjing đei tơdrong ‘lơ̆ng vă tưk tơiung dôm đon tơchĕng ‘nao, kon pơlei đei tơdrong pơvei xă ƀiơ̆, chă tơƀâp lơ bơngai, băt lơ tơdrong ƀiơ̆, păng ưh jor tơdrong arih jŏh ayŏ kơ dŏ xoang kŭm roi lơ, roi ‘lơ̆ng ƀiơ̆.”

Hăm yă Ngô Thị Minh Trinh, Phŏ Bí thư Chĕp kơ̆l Đảng apŭng Krông Pach, dêh char Đắk Lắk, tơdrong găn pơtôch tơdrong jang đơ̆ng anih jang tơ̆ apŭng, kơdih kâu yă păng khul kăn ƀô̆, bơngai jang kơ teh đak ƀơm ưh ‘lơ̆ng dêh hlŏh. Mă lei, tơdrong kăl tơjur khul bơngai jang jĭ 1 tơdrong tôch kăl, đei yoa ăn tơdrong jang atŭm kơna rim kăn ƀô̆, đảng viên tơ̆ apŭng băt hơdăh hơnăp jang đơ̆ng kơdih: “’Nao blŭng a ưh jor đei đon tơtăm, đon pơngơ̆t, tơdrong ‘nŏh ưh gơ̆h ver ôh. Mă lei kiơ̆ đơ̆ng roi tơbăt, pơma nuh, hŏk pơhrăm ‘nŏh kăn ƀô̆, đảng viên păng bơngai jang kơ teh đak băt hơdăh tơdrong gĭt kăl đơ̆ng trong jang, đơ̆ng noh vang tơgŭm pơm kiơ̆ yoa tơdrong jang tŏk atŭm kơ teh đak.”

Kiơ̆ trong tơmât hơdai tơ̆ xăh đei drơ̆ng nơ̆r tơ̆ Hop akŏm ‘măng mă 11 Khul kơdră chĕp kơ̆l Trung ương Đảng jăl XIII, kơsô̆ xăh gô đei tơjur dang 70%, vă akhan, đơ̆ng 3 xăh tơmât hơdai jing 1 xăh. Kăn ƀô̆ đảng viên tơ̆ Đắk Lắk hơnơ̆ng tơchĕng, mưh bơ̆ jang ưh jor gô tơƀâp pơmat tat blŭng a đơ̆ng rŏng kơ tơmât hơdai, đơ̆ng tơdrong juăt arih xa, tơring oei xa truh anih bơ̆ jang ‘nao. Mă lei, jơhngâm đon hơnơ̆ng năm hơdrol păng đon jang tơnăp đơ̆ng kăn ƀô̆, đảng viên tơ̆ âu hlôi pơjing đei đon lui păng jơhngâm pran ‘nao vă bơ̆ jang kiơ̆ trong jang ‘lơ̆ng hlŏh.

Yă Cao Thị Thúy Nga, Bí thư Đảng xăh Tân Lập, apŭng Krông Búk, dêh char Đắk Lắk, ăn tơbăt: “Nhôn hơtŏk kăn ƀô̆ jur tơ̆ tơring, vă bơ̆ jang ‘lơ̆ng ƀiơ̆ dôm tơdrong pơvih ăn kon pơlei – trŏ hăm jơhngâm đon ‘Kăn ƀô̆ jĭ bơngai pơvih ăn kon pơlei’. Mă đơ̆ng 1 ‘măng athei iŏk jang lơ tơdrong, mă lei hăm jơhngâm đon tơnăp, nhôn hơnơ̆ng tơchĕng: oei 1 năr pơm kăn ƀô̆ ‘nŏh oei akŏm đĭ jơhngâm yoa tơdrong bơ̆ jang păng pơvih ăn kon pơlei.”

Hrei ‘nâu, lơ̆m dêh char Đắk Lắk đei 180 anih vei lăng tơ̆ xăh (đei hloi xăh, phường, thĭ trơ̆n), đơ̆ng rŏng hơmet ming, tơmât hơdai ‘nŏh oei đei pă 45 anih jang đĕch – tơjur dang 75%. Kiơ̆ ƀok Nguyễn Hoài Dương, Kơdră Anih roi tơbăt păng krao hơvơn kon pơlei kơ dêh char Đắk Lắk, tơdrong hơmet ming âu ưh lăp tơgop jơhngâm hơmet khul bơngai jang, kăn ƀô̆ tŏ sĕt bơngai, jang rơgei đei yoa đĕch mă oei pơjing tơdrong ‘lơ̆ng vă klăih song hơdăh hơnăp jang tơ̆ xăh. Đơ̆ng noh, khul kơdră pơgơ̆r roi jê̆ kon pơlei ƀiơ̆, pơvih ăn kon pơlei roi ‘lơ̆ng păng đei yoa ƀiơ̆:

“Khei ‘năr âu ki, dôm tơring păng dôm anih jang dar dĕh hơmet ming khul bơngai jang păng truh dang ei rim tơdrong oei năm trŏ trong ngăl. Truh âu kơnh, nhôn vă hơnơ̆ng hơtŏk pran tơdrong tơmât hơdai dêh char, hŭt lê̆ apŭng, tơmât hơdai xăh. ‘Nâu jĭ trong jang tôch lăp, lăp hăm yăn âu, tơgŭm sek tơlang dôm tơdrong pơmat tat hrei ‘nâu păng tưk tơiung tơdrong đei yoa ‘lơ̆ng tơ̆ rim tơring, tơgop tưk tơiung mŭk drăm – tơpôl hơdai hăm vei kơjăp tơdrong sơđơ̆ng teh đak ‘lơ̆ng hlŏh.”

Tơdrong tơmât hơdai dôm anih vei lăng tơ̆ Đắk Lắk ưh lăp nơ̆r athei ưh kơ gơ̆h veh lơ̆m trong jang tơplih ‘nao đĕch, mă oei tơƀôh hơdăh đon jang chinh trĭ pran kơtang lơ̆m tơdrong pơjing Khul bơngai jang tŏ sĕt bơngai, jang rơgei, đei yoa, pơvih ăn kon pơlei ‘lơ̆ng ƀiơ̆. Mă đơ̆ng tơ̆ hơnăp oei đei lơ tơdrong nol, mă lei hăm tơdrong drơ̆ng 1 nơ̆r, jơhngâm đon jang tơnăp đơ̆ng khul kăn ƀô̆, đảng viên păng tơdrong tơgŭm tôch pơneh đơ̆ng đơ̆ng kon pơlei, dêh char Đắk Lắk oei dar dĕh bơ̆ jang kiơ̆ trong jang tih đơ̆ng Đảng, Teh đak ‘lơ̆ng hlŏh, bơ̆ jang khŏm kĕh păng đei ƀĕnh đon lui. Dôm tơdrong adrin năr ‘nâu jĭ tơdrong ‘lơ̆ng vă Đắk Lắk yak mât lơ̆m chăl jang tŏk ‘nao – hơbĕch hơbal, gơ̆h hơgei păng jang tŏk pran kơjăp hlŏh dơ̆ng tơ̆ ning mônh kơnh.