Kiơ̆ tơroi đơ̆ng Hơnih jang Pôk rơih dêh char Đăk Lăk, truh dang ei, tơdrong jang hơmet ăn pôk rơih lơ̆m dêh char hlôi đei jơnei kăp gĭt. Jơnŭm pơgơ̆r hơmet pôk rơih dêh char pơgơ̆r hop akŏm 'măng mă 4, tơbang dôm tơdrong pơkăp pơtôch vă pơgơ̆r jang tơnăp. Hô̆i đŏng kon pơlei dêh char akŏm đei 11 khul jang hơlen, tơlĕch hơlen tơ̆ 102 xah, phương vă dah tom băt hơdah tơdrong đei ƀôh păng pơklaih tơnap tap tơ̆ tơring.

Hơnih jang Nô̆i vŭ pơhrăm jang ăn hloh 15.000 'nu tang măt tơ̆ 103 hơnih, akŏm pơma đam, chih hơnăn bơngai lĕch măt tơgar, tơdrong hơlen kơphĭu pôk. Hop akŏm pơma đam 'măng mă 2 kơ dêh char pơdrơ̆ng gah hơnăn 22 'nu lĕch măt tơgar jang tang măt Kuô̆k hô̆i păng 144 'nu lĕch măt tơgar jang tang măt Hô̆i đŏng kon pơlei dêh char; tơ̆ xah iŏk đei hloh 4.600 hô sơ, đei bơngai kơdih lĕch măt tơgar. Đơ̆ng  năr 4–8/2 pơgơ̆r iŏk nơ̆r tơgop đơ̆ng kon pơlei tơ̆ hơnih oei xa; pơma đam 'măng mă 3 keh đang hơdrol kơ Têt.