Tơ̆ jơ sơng, pơma hơdăh tơdrong tơbôl joăt joe păng trong jang kơjăp đơ̆ng Đảng, teh đak, Khŭl kơdră teh đak Việt Nam lơ̆m tơdrong tơgŭm hơdrol tơdrong pơvei tơbôl, jang hơdai hăm Trung Quốc, Thủ tướng Phạm Minh Chính ‘meh vă 2 teh đak hơnơ̆ng hơtŏk loi dơ̆ng tơgoăt tơgoăl, hơmet ming đon lui, tŭn pran jang hơdai tôm tơdrong, tơgŭm băl vang hơtŏk tơiung.

Găh jang hơdai tơ̆ hơnăp kơnh, Thủ tướng Phạm Minh Chính athei 2 păh hơdrin pơtrŭt tĕch mơdro 2 pang kiơ̆ trong hơtŏ, ‘lơ̆ng, kơjăp, pơih ‘măng tôch ai ăn tơmam đơ̆ng choh jang sa ka hơdang păng vei rong kon tơrong kơ Việt Nam, pơm tơdrong tŏk pran păng tơgoăt anih jang gĭt kăl, tơgŭm hơdrol ‘lơ̆ng ăn jang hơdai trong gre treng vă tơƀưh 2 teh đak hăm tơring Đông Nam Á, Trung Á, châu Âu; pơtrŭt hloh dơ̆ng jang hơdai găh ŭnh hơyuh, jên hu, anih mong jên; hơtŏk loi dơ̆ng jang hơdai joh ayŏ, tơmang lăng, pơm tơdrong hiôk găh mơ̆t lĕch ăn tơmoi tơmang lăng kơ 2 păh.