Pơgê năr 7/4, Hơnih jang Sek tơlang tơdrong pơtruh đơ̆ng kon pơlei păng Dăr hơlen kơ Kuô̆k hô̆i pơgơ̆r 'măng hop akŏm tôm 'măng mă mônh. Pơma ah hop akŏm, Phŏ Kơdră Kuô̆k hô̆i Nguyễn Doãn Anh thơ thou hơ-iă hăm Hơnih jang Sek tơlang tơdrong pơtruh đơ̆ng kon pơlei păng Dăr hơlen kơ Kuô̆k hô̆i  jăl 16 đei keh đang hăm 35 'nu jang, atŭm hăm noh bơnê kơ tơdrong hăt hot chih akŏm tơdrong pơkăp sơnong jang dơnơm ăn sơnăm 2026.

Ră hơdah kơ tơdrong kăl tơplih 'nao, hơtŏk jang đei jơnei tơdrong dăr hơlen, Phŏ Kơdră Kuô̆k hô̆i Nguyễn Doãn Anh akhan, tơdrong jang ou gô tơjră hăm lơ tơdrong tơnap tap, athei tơplih 'nao trong pơm jang, tơdrong jang vă pơtrŏ hăm tơdrong đei ƀôh. Tơdrong jang dăr hơlen athei tơguăt hăm Tơchơ̆t Hop akŏm mă 14 kơ Đảng, dôm tơchơ̆t, trong jang đơ̆ng Trung ương păng Hơnih tơm Chinh trĭ, adoi nhen pơkăp trong jang lơ̆m nơ̆r pơma pơgơ̆r đơ̆ng Tổng Bí thư ah 'măng hop akŏm mă blŭng kơ Kuô̆k hô̆i jăl 16. Sơnăm 2026, Hơnih jang gô tơgŭm chih akŏm dôm tơdrong jang kăp gĭt vă hơtŏk jang đei jơnei tơdrong dăr hơlen.