Kiơ̆ tơroi ah hop akŏm, GRDP jăl I kơ dêh char Đăk Lăk tŏk 7,47%, kơđeh hloh tơchơ̆t tơlĕch. Minh ƀar tơdrong jang tŏk kơtang nhen kŏng ngĭp – ming man, asong jên jang kơ teh đak, hơvơn asong jang tam mă trŏ nhen tơchơ̆t. Rim bơngai tang măt ăn tơbăt, dang ei jên asong jang tŏk kăp kiơ̆ kơjă đak xăng đak dou, tŏk bŏk pơrăm truh tơdrong pơm jang, tĕch pơdro. Gah tơdrong ming man tŏk kơđeh kơlih kơjă tơmam ming man tŏk kăp păng jên hrŭ 'mong teh iŏk ming man adar.

Hăm tơnap tap gah tơdrong tơchơ̆t hơtŏk, ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk pơgơ̆r hăm rim hơnih jang dah tenh kuăng hơlen lăng tôm tơchơ̆t, akŏm hơmet dôm tơdrong jang hơtŏk kơđeh, drŭt tenh tơdrong asong jên jang kơ teh đak, pơklaih tơhlăk tơhlĭn ăn dôm tơdrong jang dơnơm. Đe kơdră kơpal athei kơtă pơgơ̆r jang păng chiu pŭ gah tơdrong jơnei kơ pơm jang.