pơma tơ̆ pơgơ̆r blŭng a hop akŏm mă Blŭng, Kuô̆k hô̆i jăl XVI, Tổng Bí thư Tô Lâm pơma hơdăh, ‘nou jĭ ‘măng hop akŏm pơm pơkeh khul kơdră chĕp pơgơ̆r Teh đak kiơ̆ Khôi luơ̆t; adoi jĭ ‘măng hop akŏm akŏm pơma dơnuh tơlĕch jang kiơ̆ Tơdrong tơchơ̆t Hop akŏm tih kơdră tang măt lơ̆m teh đak ‘măng mă XIV kơ Đảng, pơjing trong tơchơ̆t kăl păng jơhngơ̆m pran vă teh đak yak mơ̆t lơ̆m jơ atŏk tơ iung ‘nao, athei rim bơngai tang măt Kuô̆k hô̆i jăl XVI kăl hơnơ̆ng hlôh vao akhan bơ̆n ưh khan lăp tang măt ăn hơnih pôk rơih, ưh khan lăp chĕp hla kơphĭu kơ bơngai tăh hla, mă oei pŭ ba hơnăp jang kơ teh đak, hăm tơdrong lui yom kơ kon pơlei, hăm ning nai kai ning mônh kơ jơhnơr đơ̆ng rŏng. ‘Moi kiơ̆ trong ou, Tổng Bí thư athei, Kuô̆k hô̆o jăl XVI akŏm tơlĕch jang ‘lơ̆ng 4 tơdrong jang tơm lơ̆m ou đei pơm hơtok loi dơ̆ng tơdrong kăl kơ tơdrong tơchơ̆t, tơlĕch jang kiơ̆ ‘lơ̆ng tơdrong tơchơ̆t đơ̆ng Đảng jing trong jang păng khôi luơ̆t; pơjing đei tơdrong tơchơ̆t kăl vă jang kiơ̆ jơnei rim tơdrong jang atŏk tơ iung mŭk drăm - tơpôl jăl jang 2026–2031 păng dôm sơnăm đơ̆ng rŏng. Mĭnh ‘măng dơ̆ng pơma hơdăh, hăm tơdrong joăt joe 80 sơnăm pran kơtang kơ Kuô̆k hô̆i Việt Nam; hăm trong chĕp pơgơ̆r pran kơjăp, gơh hơgei đơ̆ng Đảng; hăm drơ̆ng mĭnh ƀơ̆r đon, tơgum djru đơ̆ng kon pơlei; hăm tơdrong vang iung jang hơdoi kơjăp đơ̆ng Khul kơdră teh đak păng pơ đĭ lơ̆m khul chinh trĭ; Tổng Bí thư lui akhan, Kuô̆k hô̆i jăl XVI ưh kơ jor iŏk đei kơnei kơtang mă Đảng, teh đak păng Kon pơlei pơjao ăn; tơgop atŭm lơ̆m Đảng, pơđĭ lơ̆m kon pơlei, ƀô̆ đô̆i kong ang iung jang tơdrong hơpơi ‘meh vă tơ iung pơjing mĭnh teh đak Việt nam rơngei hiôk hian, pơm tơm kơdih, pơdrong pran kơtang, hơnŭk hơnoa, pran kơjăp iăp kơtang yak mơ̆t lơ̆m chủ nghĩa xã hội.