Lơ̆m năr bơ̆jang mă blŭng kơ ‘Măng hop akŏm mă Mônh, Quốc hội jăl 16, pơgê 6/4, Quốc hội hlôi pơgơ̆r pôk Kơdră Quốc hội teh đak Cộng hòa xã hội chủ nghĩa Việt Nam jăl XVI, jăl jang 2026-2031. VOV.Bahnar - Kơdră Quốc hội jăl XV Trần Thanh Mẫn hlôi đei Quốc hội pôk hơnơ̆ng pơm Kơdră Quốc hội jăl XVI. Tơdrong tơchơ̆t tơdrong pôk ƀok Trần Thanh Mẫn pơm dơ̆ng Kơdră Quốc hội hlôi đei dôm bơngai tang măt Quốc hội yơ̆r ti pơdrơ̆ng kiơ̆ hăm 491/491 bơngai tang măt vang yơ̆r ti drơ̆ng lăp. Pơma đơ̆ng rŏng kơ iŏk jang, Kơdră Quốc hội Trần Thanh Mẫn bơnê kơ bơngai tăh hla pơlei tơm Hồ Chí Minh hlôi lui ngeh pôk pơm bơngai tang măt Quốc hội jăl 16; dôm bơngai tang măt Quốc hội hlôi lui pôk pơm Kơdră Quốc hội teh đak Cộng hòa xã hội chủ nghĩa Việt Nam jăl 16; akhan, ‘nâu jĭ tơdrong chhôk hơiă tih tên, hơdai hăm jing hơnăp jang gĭt kăl tơ̆ hơnăp Đảng, Teh đak, bơngai tăh hla păng Kon pơlei lơ̆m teh đak.

Kơdră Quốc hội Trần Thanh Mẫn khŏm jang đĭ jơhngơ̆m, pơvih ăn teh đak, pơvih pơvăn ăn kon pơlei; kŭm hăm Quốc hội, Anih chĕp kơ̆l pơgơ̆r Quốc hội, rim anih jang kơ Quốc hội păng dôm bơngai tang măt Quốc hội hơnơ̆ng tơplih ‘nao, tŭn pran iŏk yua khoa hŏk kơmăy kơmŏk, tơplih pơcheh hơgei, Quốc hội kơsô̆, kơmăy gơh hơgei, hơtŏk ‘lơ̆ng păng đei yua tơdrong jang, pơma năm hơdai hăm jang, jang hloi, jang trŏ, jang đei yua, jang truh tôch.