Tơchĕng adrol jơnăr bơ̆ jang lơ̆m Hop akŏm âu dang 11 năr, klăih song pơm 2 đơt (Đơt 1: đơ̆ng ‘năr 6/4 truh ‘năr 12/4; Đơt 2: đơ̆ng ‘năr 20/4 truh ‘năr 23/4/2026). Tơ̆ hop akŏm ‘măng mă âu, Quốc hội vă rơih hơmet bơngai jang tih lơ̆m Anih jang ăn teh đak, hơlen năng drơ̆ng nơ̆r ăn 8 kơ luơ̆t, 1 tơdrong hơgăt luơ̆t; atŭm hăm ‘nŏh hơlen năng, tơchơ̆t ăn dôm trong jang tih kơ teh đak găh atŏk tơiung mŭk drăm - tơpôl, pơm ‘lơ̆ng ăn tơdrong sơđơ̆ng, jên hu teh đak, jên tơlĕch jang đơ̆ng teh đak, jên tŏk iŏk, kla hre đơ̆ng teh đak lơ̆m 5 sơnăm truh.

Kiơ̆ kơ ‘nŏh, Quốc hội vă pôk rơih dôm kơchư̆k chĕp kơ̆l tơm dơnơm đei: Kơdră Quốc hội, dôm Phŏ Kơdră Quốc hội, Kơdră jang lơ̆m Anih chĕp kơ̆l pơgơ̆r Quốc hội, Kơdră teh đak, Phŏ Kơdră teh đak, Thủ tướng teh đak, Kơdră Anih tơm sek tơlang kon pơlei, Kơdră Anih tơm tơkêng tơdrong yoch, Kơdră Anih jô̆ hơlen jên teh đak. Atŭm hăm ‘nŏh, Quốc hội oei vă kĭ ăn tơdrong pôk hơtŏk dôm kơchư̆k jang lơ̆m Khul kơdră teh đak đei: dôm Phó Thủ tướng teh đak, dôm ƀok Kơdră chĕp kơ̆l Anih jang tơm păng bơngai jang lơ̆m Khul kơdră teh đak kŭm hăm 1,2 kơchư̆k jang nai kiơ̆ hơnăp jang gơ̆h jang. Kiơ̆ tơdrong hơgăt đơ̆ng Khôi luơ̆t tơm sơnăm 2013, đơ̆ng rŏng kơ đei Quốc hội pôk rơih, Kơdră Quốc hội, Kơdră teh đak, Thủ tướng teh đak, Kơdră Anih tơm sek tơlang kon pơlei vă iung pơma nơ̆r pơsĭt tơ̆ hơnăp Quốc hội.