Roi tơbăt đơ̆ng Anih vei lăng găh Choh jang sa păng Cham char dêh char Lâm Đồng ăn ƀôh, đơ̆ng blŭng sơnăm truh dang ei kơjă tơmam phŏng, pơgang vei lăng ‘long pơtăm đĭ tŏk jô̆ păh lăp dang 10%, hơdrô̆ phŏng tŏk dang 17%. Tơdra hơdrol đơ̆ng dang ei truh hơtuch sơnăm, jên tơmơ̆t jang blŭng ăn choh jang sa gô tŏk đơ̆ng 3- 5%, đei tơmam tŏk truh 10%. Mă đơ̆ng kơjă tơmơ̆t jang blŭng tŏk, tơdrong jang choh jang sa, bri ‘long, ka hơdang kơ dêh char Lâm Đồng oei pơvei tŏk sơđơ̆ng, iŏk đei 5,39% lơ̆m jăl khei mă 1 sơnăm ‘nâu.

Anih vei lăng găh Choh jang sa păng Cham char gô hơnơ̆ng tơlĕch jang lơ trong jang trŏ lăp vă tơgŭm kon pơlei jang chŭn mir. Lơ̆m noh găh lơ dang ei ‘noh tơgŭm hơdrol sơđơ̆ng jên jang sa, kơchăng tơlĕch jang dôm trong jang tơ jur ƀiơ̆ jên pơhoach, vei lăng kơjăp tơmam păng pơtho kon pơlei tơplih, hơmet ming trong jang sa, pơm tơlĕch mă trŏ lăp.