Tơchơ̆t pôk jang kơchư̆k Kơdră teh đak đei rim bơngai tang măt Kuô̆k hô̆i drơ̆ng nơ̆r hơlen hăm tôm 495 kơphĭu đơ̆ng bơngai tang măt Kuô̆k hô̆i vang akŏm drơ̆ng nơ̆r. Đơ̆ng rŏng kơ đei Kuô̆k hô̆i pôk, Tổng Bí thư, Kơdră teh đak bơ̆n Tô Lâm hlôi tơchơ̆t iŏk jang kơchư̆k: "Hăm hla kơ brê hơnglŏng dreng grasia kơ Teh đak, tơ̆ hơnăp Kuô̆k hô̆i, kon pơlei păng bơngai tah hla jơ̆p teh đak, inh, Kơdră teh đak Cộng hòa xã hội chủ nghĩa Việt Nam pơtruh nơ̆r tơchơ̆t: Khŏm mă tơguăt kơjăp hăm Teh đak, hăm kon pơlei, hăm Khôi luơ̆t teh đak Cộng hòa xã hội chủ nghĩa Việt Nam, hơdrin keh đang rim sơnong jang đei Đảng, Teh đak păng kon pơlei pơjao ăn".

Pơma ah jơ tơchơ̆t iŏk jang đơ̆ng rŏng kơ noh, Tổng Bí thư, Kơdră teh đak bơ̆n Tô Lâm pơtruh nơ̆r hmach bơnê kơ bơngai tah hla păng kon pơlei jơ̆p teh đak hăm sơnong jang, tơdrong hơpơi 'meh tơ-iung pơjing pơlei pơla, teh đak păng đon lui kơjăp hăm Đảng Cộng sản Việt Nam hlôi pơjing 'măng pôk rơih bơngai tang măt Kuô̆k hô̆i jăl 16 păng bơngai tang măt ăn Hô̆i đŏng kon pơlei dôm jăl jang kơ sơnăm 2026-2031 đei jơnei keh kong.