Kiơ̆ trong vă jang tŏk, đơ̆ng 2026–2030, Đắk Lắk tơlĕch đon pơhnŏng jang tŏk jô̆ păh lăp đơ̆ng 11–11,5% 1 sơnăm; akŏm đĭ đăng GRDP 5 sơnăm đei vă jê̆ 700 rơbâu tih hlak jên. Trong vă jang kiơ̆ rim sơnăm ‘nŏh tŏk truh 2 kơsô̆ ngăl, đơ̆ng 10,2% sơnăm 2026 truh 12% lơ̆m sơnăm 2030. Dôm tơdrong ‘lơ̆ng vă jang tŏk đei chih hơdăh ‘nŏh choh jang xa tŏk pran kơjăp, jang kơmăy jĭ jơhngâm pran tơm, oei ming man ‘nŏh jĭ tơdrong ‘lơ̆ng vă tưk tơiung tơdrong jang tŏk ăn lơ tơdrong jang tih. Mă lei, jăl khei mă I/2026, tơdrong jang tŏk GRDP lăp dang 7,5%, tŏ sĕt ƀiơ̆ tôch lơ pơting hăm trong vă jang. Dôm tơring jang mŭk drăm tơm jang tŏk tŏ sĕt ngăl; lơ̆m noh ming man lăp đei 3,5%. Kơjă tơmam jur lơ jô̆ hloi găh pơvih pơvăn, ming man păng jang kơmăy. Akŏm đĭ đăng jên tơlĕch jang lơ̆m tơpôl jur ƀiơ̆ pơting hăm khei âu sơnăm sơ̆.

Pơma tơblang găh tơdrong tơm jing đei thoi âu, ƀok Cao Đình Huy, Kơdră Anih vei lăng ming man dêh char Đắk Lắk akhan, dôm tơdrong oei tơhlăk mưh chưk pơ ‘ngoăih teh păng jơhngâm pran mưh bơ̆ jang đơ̆ng rim anih iŏk jang oei ƀơm ưh ‘lơ̆ng truh tơdrong jang tŏk: “Tơdrong tơhlăk găn trong bơ̆ jang ming man kŭm nhen tơlĕch jên vă ming man, mă loi ‘nŏh jĭ jên chưk pơ ‘ngoăih teh tơpă ‘nei tôch hiơ̆; mă 2 ‘nŏh ƀơm truh tơdrong pran, rơgei đơ̆ng anih iŏk jang dang ei. Kiơ̆ đơ̆ng chă hơlen năng tơ̆ 1,2 tơdrong jang hrei ‘nâu, oei đei anih jang tơlĕch jang tôch hiơ̆, athei dôm tơ ‘ngla tơmât jên jang bơ̆ jang mă pran, đei trong sek tơlang hăm dôm anih jang bơ̆ jang hiơ̆ hyĭn.”

Hăm tơring jang kơmăy kơmŏk, nơ̆r athei đei tơlĕch ‘nŏh jăh hơmet pơ ‘lơ̆ng dôm tơdrong oei tơhlăk lơ̆m dôm tơdrong jang găh unh hơyuh păng hơmet pơ ‘lơ̆ng anih jang tơ̆ tơring jang kơmăy vă gơ̆h jang tŏk hlŏh 13% tơ̆ hơnăp kơnh. Yă Nguyễn Thị Thu An, Kơdră Anih vei lăng jang kơmăy, tĕch mơdro ăn tơbăt, mă đơ̆ng hlôi hơmet đei lơ tơdrong blŭng a, mă lei mưh tơlĕch jang oei đei tơhlăk tăk yoa tam đei trong pơtho jang rơđăh ‘lơ̆ng: “Tơdrong tơchơ̆t 253-254 đơ̆ng Quốc hội ‘nao tơlĕch hlôi hơmet pơ ‘lơ̆ng trong jang găh unh hơyuh rơgoh, mă loi tơ̆ tơring pơmat tat dêh hlŏh. Mă đơ̆ng trong pơgơ̆r jang hlôi đei pơih xă mă lei dôm tơdrong tơgŭm păng tơdrong hơgăt lơ̆m dôm tơdrong tơchơ̆t âu truh dang ei tam mă đei tơlĕch kơna dôm anih jang kŭm oei tơhlăk tăk mưh tơlĕch jang.”

Tơlĕch nơ̆r athei pơgơ̆r jang kiơ̆ rim tơdrong, rim anih jang, rim jăl khei vă vei lăng ‘lơ̆ng tơdrong jang tŏk, ƀok Đào Mỹ, Phŏ Kơdră vei lăng kon pơlei dêh char Đắk Lắk akhan, athei chih hơdăh hơnăp jang mă ‘lơ̆ng: “Trong bơ̆ jang rơđăh ƀiơ̆, athei chih hơdăh kiơ̆ sơnăm, kiơ̆ rim anih jang. Lơ̆m kơsô̆ đĭ đăng tơmam iŏk yoa truh 698 rơbâu ti hlak jên âu athei tơlĕch ăn sơnăm 2026 dôm yơ, đơ̆ng noh klăih song hơdăh ăn rim anih jang; pơtih gia, anih choh jang xa dôm yơ, anih jang kơmăy păng ming man dôm yơ, tĕch mơdro dôm yơ đơ̆ng noh chih hơdăh lơ̆m rim jăl khei, pơtih gia tơdrong choh jang xa ‘nŏh ăn anih yơ, pơtăm ‘long thoi yơ, jang ka hơdang lơ liơ păng tơ̆ anih jang ‘nŏh vă jang tơdrong kiơ, tơmam kiơ vă gơ̆h chih hơdăh hơnăp jang mưh pơgơ̆r bơ̆ jang.”

Tơ̆ hơnăp nơ̆r athei jang tŏk truh 2 kơsô̆ ƀât mă lơ tơdrong jang oei bơ̆ jang hiơ̆, ƀok Lương Nguyên Minh Triết, Bí thư Đảng dêh char Đắk Lắk athei đei trong jang pran ‘lơ̆ng, mă loi jĭ hơmet ming trong pơm hla ar păng sơng iŏk jên jang. Atŭm hăm ‘nŏh, athei chih hơdăh trong tơgŭm, tơjur ƀiơ̆ khei ‘năr tơlĕch jang hăm dôm tơdrong jang tih, pơjing đei tơdrong ‘lơ̆ng đơ̆ng blŭng vă jang tŏk pran hloi đơ̆ng sơnăm 2026.

“Akŏm jơhngâm hơmet pơ ‘lơ̆ng trong pơm hla ar vei lăng, hơmet ming mă ‘lơ̆ng ăn anih tơmât jên jang, tơjur ƀiơ̆ jơnăr pơm hla ar, jên pơm hla ar, năng ‘nâu jĭ trong jang gĭt kăl vă jang tŏk tơm lơ̆m chăl hrei ‘nâu kơ dêh char. Pơjing trong pơgơ̆r bơ̆ jang "hiôk ‘lơ̆ng" ăn dôm tơdrong jang vă pơ ‘nhŏ jang hơdrol păng đei trong tơgŭm vă sơng iŏk jên tơmât jang lơ̆m dôm tơdrong jang gĭt kăl.”