Lơ̆m giĕng lêh pơgơ̆r pơih blŭng Sơnăm Tơmang lăng Teh đak 2026 pơgơ̆r hơtuch khei 3 âu ki, Gia Lai sơng đei dôm jĭt rơbâu ‘nu tơmoi lơ̆m păng ‘ngoăih teh đak truh năm chă tơmang lăng. Hơnih tơƀơ̆p pơma dơnuh păng lêh ƀĕnh kơmâu ‘lơ̆ng hơiă hăm tơdrong jang lơ: đơ̆ng Hop akŏm Hơtŏk tơiung Mŭk drăm Tơmang lăng Gia Lai 2026, hop akŏm pơtrŭt tơmơ̆t jên jang, dôm tơdrong jang tơƀơ̆p pơma dơnuh apŭng plĕnh teh, klĕp truh dôm tơdrong hơri hơsoang chơt hơiă. Dôm tơdrong lăng vă kơbăt âu pơm ăn lơ tơdrong ‘lơ̆ng hơiă hăm tơmoi, tơgop hơnhăk Gia Lai jing hơnih năm truh hơiă kơ Sơnăm Tơmang lăng Teh đak. Buăl mơlôh Lê Thanh Phương Hạ, tơmoi tơmang lăng truh đơ̆ng kơphô̆ đak dơsĭ Nha Trang, dêh char Khánh Hòa, tơroi:

“Ĭnh đơ̆ng Nha Trang truh, tơpă ‘noh ‘măng mă blŭng ĭnh ƀôh tơring Tŏk bŏk bơ̆n đơ̆ng sơ̆ truh dang ei đei 1 ‘măng hơri hơsoang tih thoi noh, kơna ĭnh khŏm mă năm. Ĭnh hao gre hon đa đơ̆ng Nha Trang năm tơ̆ âu hloh 4 jơ 1 puăt, mă lei hơiă păng chơt ƀơ̆t truh tơ̆ Gia Lai.”

Lơ̆m tơdrong năm chă ngôi, chă lăng tơ̆ Việt Nam, ƀok Roman, tơmoi tơmang lăng truh đơ̆ng teh đak Nga, ưh kơ ê mơ̆t hơdai lơ̆m jơ ‘năr chơt hơiă kơ Giĕng lêh pơgơ̆r pơih blŭng Sơnăm Tơmang lăng Teh đak 2026 tơ̆ Gia Lai. Lơ̆m hơnih đak dơsĭ - groi kông ƀĕnh tơdrong ‘lơ̆ng hơiă joh ayŏ tơring, ƀok Roman tơbăt, ‘măng năm âu hlôi hơnhăk ăn kơ sư kŭm hăm khŭl tơmoi tơmang lăng Nga dôm tơdrong hơiă tôch kơ hơdrô̆: “Ĭnh đĭ truh tơ̆ lơ hơnih kơ Việt Nam nhen Đà Nẵng, Nha Trang, mă lei tơ̆ noh tôch lơ. ‘Măng âu truh tơ̆ Gia Lai, ĭnh ƀôh hơnih tôch kơ ‘lơ̆ng, sơđơ̆ng păng oei hiôk dơ̆ng. Mă loi ‘noh, truh ƀlep ‘măng Sơnăm Tơmang lăng teh đak pơm ăn ‘măng năm âu sa roi hơiă hloh dơ̆ng”.

Pơtăl jang kiơ̆ đơ̆ng lêh pơgơ̆r pơih blŭng, lơ̆m jăl khei mă II/2026, dêh char Gia Lai hơnơ̆ng tŭn pran pơtrŭt roi tơƀôh tơ̆ dôm jơnŭm kơchơ tih tơ̆ Hà Nội păng pơlei tơm Hồ Chí Minh. Hơdai hăm ‘noh, Gia Lai kŭm gô pơgơ̆r lơ tơdrong jang pơm hơiă ăn Sơnăm tơmang lăng teh đak 2026, kăl kơ lăng truh gô đei Joh hơri tih apŭng plĕnh teh (K-Pop), pơm tơdrong hơiă ‘nao ăn um rup tơmang lăng. Hơdai hăm ‘noh, Festival apŭng plĕnh teh tôn chĭng chêng Tây Nguyên gô jing tơdrong jang ‘lơ̆ng, hơnhăk ăn ƀĕnh tơdrong ‘lơ̆ng hơiă joh ayŏ bri kông. Kơdră Anih tơm vei lăng găh Joh ayŏ, Tơplŏng kơdâu păng Tơmang lăng Nguyễn Văn Hùng hôn bơnê tơdrong jang păng hơmĕng Sơnăm Tơmang lăng Teh đak gô pơm tơiung ‘lơ̆ng ăn tơmang lăng dêh char Gia Lai.

“Hăm 244 tơdrong jang đei pơgơ̆r hơnơ̆ng prăt lơ̆m sơnăm 2026. Vă Sơnăm Tơmang lăng  Teh đak gô jing 1 tơdrong jang pơtrŭt roi tơƀôh găh 1 um rup Gia Lai ‘nao, ‘lơ̆ng, rơhâu, đei lơ tơmam, hơtŏk loi dơ̆ng jang hơdai tơring kiơ̆ kơjă kăp gĭt, sơng đei bơngai tơmơ̆t jên jang gĭt kăl lơ̆m tơmang lăng, pơjing dôm tơmam tơmang lăng ‘lơ̆ng hơdrô̆ păng kĕ pơjei hăm apŭng plĕnh teh”.

Dêh char Gia Lai tơlĕch ăn tơdrong hơgăt sơng dang 15 triệu ‘nu tơmoi, hăm iŏk yua đơ̆ng tơmang lăng dang 35.000 ti hlak jên lơ̆m Sơnăm tơmang lăng teh đak 2026. ‘Nâu kŭm jing tơdrong hiôk vă Gia Lai tơƀôh hơdăh dơ̆ng um rup tơmang lăng, pơtrŭt jang hơdai tơring păng hơtŏk tơiung kiơ̆ trong kơjăp ‘lơ̆ng. Ƀok Phạm Anh Tuấn, Kơdră Anih vei lăng kon pơlei dêh char Gia Lai pơma hơdăh khŏm hơdrin đơ̆ng tơring:

“Dêh char Gia Lai pơkăp gô pơgơ̆r jơnei sơnăm Tơmang lăng teh đak 2026 hăm jơhngơ̆m đon jang hơgei, sơđơ̆ng, hiôk, ‘lơ̆ng rŏ vă rim tơmoi truh adoi ƀôh đei tơdrong tơpăt ‘lơ̆ng, pha păng ƀlŏk ling lang. Nhôn lui ngeh akhan đơ̆ng tơdrong jang năr ‘nâu, Gia Lai ‘nao gô yak tŏk jing hơnih năm truh hơiă, hơnih akŏm, tơƀưh, păr ang dôm kơjă kăp gĭt joh ayŏ păng tơmang lăng gĭt kăl kơ Việt Nam păng tơring.”

Sơnăm Tơmang lăng Teh đak 2026 tơ̆ dêh char Gia Lai hơnơ̆ng hăm tơdrong ‘lơ̆ng hơiă pơdui đunh pơđĭ sơnăm. Đơ̆ng dôm tơdrong jang joh ayŏ ƀĕnh tơdrong ‘lơ̆ng hơiă bri kông truh dôm tơdrong jang joh hơri hơsoang, tơmang lăng ‘nao kơ apŭng plĕnh teh, tơring tŏk bŏk ƀrư̆ ƀrư̆ pơjing um rup 1 hơnih truh ‘nao, ƀĕnh tơdrong ‘lơ̆ng. Hăm tơdrong mơ̆t jang đơ̆ng khŭl kơdră tơring, anih mơdro sa păng tơpôl, Gia Lai hơmĕng pơm hơyak tŏk pran lơ̆m sơng tơmoi tơmang lăng, hơdai hăm ‘noh, pơm tơdrong ‘lơ̆ng vă tơmang lăng jing tơdrong jang mŭk drăm gĭt kăl, tơgop hơnhăk tơring teh akŏm hơdai groi kông - đak dơsĭ jing hơnih năm truh hơiă lơ̆m hla kak tơmang lăng Việt Nam păng apŭng plĕnh teh./.