Yă H’Dit Byă, tơ̆ pơlei Dhă Prông, phương Buôn Ma Thuột, dêh char Đăk Lăk chơt hơ-iă ăn tơbăt, yă phiơk kơ jơhngơ̆m ah năm khăm hơmet jĭ mă chĕp ba điê̆n thuăi đĕch đei kai ư̆ng yŭng VNeID: “Đơ̆ng mă iŏk yua VNeID noh ah năm tơ̆ hnam pơgang ưh kăl yua the ƀao hiêm hla ar bơih mă chih tơmơ̆t lơ̆m điê̆n thuăi, hiôk kơdêh”.

Kiơ̆ chih hơlen, lơ̆m sơnăm ou, jơ̆p dêh char Đăk Lăk đei hloh 6,9 triu 'nu bơngai khăm, hơmet jĭ yua kăn kươk kon pơlei; hloh 2,5 triu the kăn kươk đei tơmơ̆t hơdai hăm the ƀao hiêm hơmet jĭ jăn oei khei năr yua. 'Nou jĭ tơdrong đei jơnei mă blŭng lơ̆m tơdrong pơtơm Jang hơtŏk iŏk yua ư̆ng yŭng chih akŏm gah tơring kon pơlei oei xa, chih hơdah hơnăn păng sơkơ̆t điê̆n tưh 'măn ăn tơdrong tơplih kơmăi kơsô̆ kơ teh đak (krao kơđeh noh Tơdrong jang 06) lơ̆m tơring.

Thượng tá Võ Hùng Tường, Kơdră hơnih Kanh sat Vei lăng hanh chĭnh gah sơđơ̆ng tơpôl, Kŏng an dêh char Đăk Lăk ăn tơbăt, khul kŏng an hlôi truh rim unh hnam pơtho kon pơlei kai đăt, iŏk yua tai khuan chih măt điê̆n tưh  VNeID, mă kăl noh tơ̆ tơring hơtaih yaih, tơring kon pơlei kon kông. Kiơ̆ kơ noh, tơdrong hlôh vao păng tơdrong drơ̆ng lăp đơ̆ng kon pơlei hăm hơmet 'lơ̆ng hanh chĭnh, tơplih kơmăi kơsô̆ đei hơtŏk hơdah: “Sơkơ̆t hơdah hơmet 'lơ̆ng hanh chĭnh jĭ tơdrong kăp gĭt păng dơnơm vă hơtŏk rah dôm tơdrong jang, pơm trong hiôk hloh rah ăn kon pơlei, hơnih jang mŭk drăm. Khei năr ou ki, nhôn jang tơnăp tơdrong tơgŭm ăn khul kơdră kơpal Kŏng an dêh char, tơlĕch jang drơ̆ng minh dôm trong jang vei lăng hanh chĭnh gah vei sơđơ̆ng tơpôl lơ̆m tơring”.

Pơm kiơ̆ Tơdrong jang 06, lơ̆m 3 sơnăm kơ ou, dêh char Đăk Lăk hlôi keh đang tơdrong sơng iŏk, asong theh kăn kươk kon pơlei đei chô̆ chip ăn tôm kon pơlei kiơ̆ tôm pơkăp; asong tai khuan chih hơnăn điê̆n tưh ăn hloh 10.000 hơnih jang. Truh dang ei, jê̆ 10.000 hô sơ asong kơphĭu lĭ lĭch tư phap đei pơm kiơ̆ VNeID; hloh 90% tơdrong jang kŏng kăp gĭt đei pơm jang trư̆k tuyê̆n, pơm trong tơplih tơm đơ̆ng “hô sơ hla ar” jing “chih tơmơ̆t lơ̆m kơmăi kơsô̆”.

Atŭm hăm tơdrong chih akŏm tôm gah tơring kon pơlei oei xa, Tơdrong jang 06 tơ̆ Đăk Lăk tŏk bŏk tơgŭm pơm keh đang hla bar hanh chĭnh kiơ̆ trong ƀônh hiôk, păng hơdah hloh ăn kon pơlei. Lơ trong pơm jang 'nao nhen tơroi gah hơnih oei xa kiơ̆ phân mêm ASM, hơdoi pơm hla bar hanh chĭnh gah groi teh, vei lăng gah bơngai yua teh kiơ̆ Hơnih chih akŏm kơ teh đak gah tơring kon pơlei oei xa, VNeID dah mă kiosk kơdih pơm jang tơ̆ dôm hơnih jang pơgang hlôi tơgop pơm kơđeh jơ năr gô, tơjur ƀiơ̆ tơdrong akŏm kơtă.

Kiơ̆ Đại tá Trần Bình Hưng, Phŏ Kơdră Kŏng an dêh char Đăk Lăk, vă dôm tơdrong jang đei jơnei ou pơtoi sơđơ̆ng kơjăp, sơnong jang kơ bơngai chĕp kơ̆l dôm hơnih jang, tơring kăp gĭt hloh: “Bơngai chĕp kơ̆l athei đei sơnong chơng trong, păng pơgơ̆r đe kan ƀô̆, khul linh pơm jang sơnong tơlĕch. Vă jang đei jơnei Tơdrong jang 06 lơ̆m sơnăm 2025 păng dôm sơnăm đơ̆ng rŏng kơ noh, sơnong kơ bơngai chĕp kơ̆l dôm hơnih jang, tơring noh jĭ kăp gĭt hloh”.

Hăm tơdrong vang jang drơ̆ng minh, tơnăp đơ̆ng tôm hơnih jang chinh trĭ, truh dang ei, Đăk Lăk hlôi đei jơnei pơkăp  “JƠK” tơ̆ tôm 102 xah, phương; keh đang tôm 108 tơchơ̆t kiơ̆ Pơkăp kơsô̆ 02 đơ̆ng Jơnŭm pơgơ̆r Trung ương gah hơtŏk tơplih kơmăi kơsô̆ tơroh kơpal, drơ̆ng minh, tenh păng đei jơnei. Đăk Lăk jĭ minh lơ̆m dôm tơring mă blŭng kơ jơ̆p teh đak keh đang sơnong jang hơdrol kơ khei năr pơkăp, pơtrŏ hăm pơkăp jơnŭm pơgơ̆r păng trong pơm jang kơ jơnŭm pơgơ̆r tơring 2 tăl. Tơdrong đei jơnei ou pơtoi sơkơ̆t hơmet ‘lơ̆ng hanh chĭnh tơguăt hăm Tơdrong jang 06 ưh hơdrô̆ trong jang kih thuơ̆t, mă jing trong tơplih kăp gĭt lơ̆m tơdrong vei lăng, tơgop hơtŏk ‘lơ̆ng pơm jang ăn kon pơlei, hơnih jang mŭk drăm păng đei Trung ương hmach bơnê.