Tơ̆ hơnih pơm trong nơnăm tơ̆ xăh tơƀưh Ea Wer păng Ea Nuôl (dêh char Đắk Lắk), bơngai jang tŏk bŏk var găn jih, ƀŭ jrăng, tơsơng chrek trong... vă jang đang dôm tơdrong jang hơtuch, jăh ăn trong gơh năm vih vơ̆t. Ƀok Trần Anh Dương, Kơdră vei lăng Kŏng ti pơm trong Dương Hiền (xăh Ea Nuôl, dêh char Đắk Lắk) roi tơbăt, trong đei kơjung 3,9 km, akŏm jên tơmơ̆t jang 18,5 ti hlak jên, yua đơ̆ng 3 anih tơmơ̆t jên jang hơdai bơ̆jang, khei ‘năr bơ̆jang đơ̆ng 2/2024 truh 9/2025. Dang ei răt bơ̆n tơmam ming man yua đơ̆ng anih mơdro sa vei lăng hlôi jang đang 95% tơdrong jang. Mă lei, jên tơlĕch jang ăn anih mơdro sa oei tŏ sĕt, ƀơ̆t mă tơdrong jang oei athei vei sơđơ̆ng ‘lơ̆ng. Ƀok Dương tơroi.

“Trong năm tơ̆ xăh âu pơm đơ̆ng khei 2 năm 2024 truh dang ei, mă lei dang ei ‘nao tơlĕch jên jang đei 2,5 ti lơ̆m akŏm răt bơ̆n tơmam jang 8,5 ti hlak jên. Dang ei trong pơm vă jê̆ đang bơih, lăp oei pă dôm tơdrong iĕ nhen hơtơ̆p jrăng, 1,2 hơnih găn jih... Trong pơm đang bơih mă jên tơlĕch jang tam mă dôm yơ, nhôn athei năm tŏk iŏk vă bơ̆jang, 1 khei dơ̆ng đĭ hla ar pơkăp mă ưh kơ đei kla jên ‘noh pơmat tat dêh.”

Lơ̆m trong tơlĕch jang tơmơ̆t jên jang teh đak sơnăm 2025, apŭng Buôn Đôn (so) đei dêh char Đắk Lắk hơmet ăn 106 ti hlak jên vă kla jên hre dôm tơdrong jang pơtăl dơ̆ng đơ̆ng sơnăm hơdrol păng tơlĕch jang ‘nao dôm tơdrong jang pơm trong nơnăm, ming man anih bơ̆jang, hnam trưmg hŏk, hnam pơgang xăh lơ̆m sơnăm ‘nâu. Ƀok Cao Ngọc Duy - Kơdră Anih vei lăng tơdrong jang apŭng Buôn Đôn (so) roi tơbăt, truh khei ‘năr âu, anih jang ‘nao tơlĕch jên jang đei 40 ti hlak jên, iŏk đei 39% trong tơlĕch jang. Ƀok Duy tơbăt dơ̆ng, tơdrong tơlĕch jên jang đĭ hiơ̆ đơ̆ng blŭng sơnăm păng đơ̆ng ‘năr 01/7 truh dang ei sa roi đei pơhiơ̆.

“Lơ̆m kơplăh tơmơ̆t hơdai đơ̆ng ‘năr 01/7, jên athei gơih ăn Anih vei lăng jên hu vă vei lăng. Mă lei, truh khei ‘năr âu tam klăih song dơ̆ng ăn tơ ‘ngla tơmơ̆t jên jang, yua thoi noh tơdrong tơlĕch jên jang pơdơh đơ̆ng năr tơmơ̆t hơdai truh dang ei, dôm bơngai iŏk jang ưh kơ đei kla jên. Kơtă hloi ƀơ̆t tơlĕch trong jang jên jang hlôi đei hơmet ăn, mă lei ưh kơ đei tơchơ̆t pơjao ăn tơ ‘ngla tơmơ̆t jên jang ‘noh nhôn kŭm ưh kơ gơh tơlĕch jên. ‘Ngoăih kơ ‘noh, yua đơ̆ng tơmơ̆t hơdai 2 tăl, bơngai jang 2 tăl kơ anih jang tam mă đei tôm, ‘long đŏng yŏu tam mă đei, hơnhăk truh tơdrong tơlĕch jên jang truh khei ‘năr âu tŏ sĕt hloh pơting hăm dôm sơnăm hơdrol.”

Ƀok Trương Công Thái, Phŏ Kơdră Anih vei lăng kon pơlei dêh char Đắk Lắk, roi tơbăt đơ̆ng rŏng kơ dêh char bơ̆jang kiơ̆ tơmơ̆t hơdai păng hŭt apŭng đơ̆ng ‘năr 01/7, pơđĭ dôm Khŭl vei lăng tơdrong jang tơ̆ apŭng athei tơplih tơ̆ găh 3 Anih vei lăng tơdrong jang tơ̆ dêh char păng dang ei ‘noh tŏk bŏk proh hơmet jing dôm anih jang tơring. Tơdrong jang âu dui kiơ̆ tơdrong tơpilh ‘long đŏng yŏu, tơplih găh bơngai jang, hơdai hăm athei pơm dơ̆ng tài khoản, hlôi ƀơm ưh kơ ‘lơ̆ng kơtă truh tơdrong tơlĕch jên tơmơ̆t jên jang teh đak ăn dôm tơdrong jang ming man. Ƀok Trương Công Thái roi tơbăt, tơ̆ hơnăp tơdrong ‘noh, Anih vei lăng kon pơlei dêh char hlôi pơgơ̆r kơtang tơdrong hơmet tôm bơngai jang, tŭn hrĕnh tơdrong asong ăn ‘long đŏng yŏu păng tơlĕch jang klăih song rơđăh lơ̆m tơlĕch jên tơmơ̆t jên jang teh đak:

“Truh khei ‘năr âu dôm anih jang kơ apŭng hơdrol ki tơplih jang tơ̆ dêh char ‘noh hlôi jang đang pơm tơplih ‘long đŏng yŏu, pơm  tài khoản păng hơmet tôm bơngai jang. Thoi noh, hơtuch khei 9 âu gô tŭn hrĕnh tơdrong ‘mong dơ̆ng kơsô̆ jên tam mă tơlĕch ăn mă âu ki đei pơ hiơ̆. Hơdai hăm ‘noh nhôn kŭm athei dôm tơ ‘ngla tơmơ̆t jên jang, bơngai iŏk jang jăh tơtĕnh pơm hla ar hô sơ kla jên tơdrong iŏk jang hơdrol ‘noh vă iŏk pơdreo jên iŏk lê̆ hơdrol, vei sơđơ̆ng tơdrong jang tơlĕch jên jang păng tơgŭm bơngai iŏk jang đei jên bơ̆jang dơ̆ng.”

‘Ngoăih kơ hơmet pơ ‘lơ̆ng tơdrong ưh kơ măh ‘long đŏng yŏu hơnhăk truh pơhiơ̆ tơlĕch jên jang, Đắk Lắk kŭm hơtŏk loi dơ̆ng pơhrăm - klăih song jang đơ̆ng dôm anih jang, tơring. Kiơ̆ kơ ƀok Huỳnh Gia Hoàng, Phŏ Kơdră Anih vei lăng Jên hu dêh char Đắk Lắk, ƀơ̆t rơđăh tơdrong jang, rơđăh hơnăp jang đơ̆ng rim khŭl jang, rim anih jang, ‘noh pơđĭ 2 tơdrong tơklăk tih găh tơlĕch jên jang păng iŏk pơ ‘ngoăih teh tơ̆ dêh char, tă kơ đei hơmet ‘lơ̆ng ngăl:

“Tơpă mơ̆n, kang ƀô̆ rim tơring đei ƀôh pơvĭnh. Kơna rim anih jang hlôi pơih dôm lăm pơhrăm vă klăih song rơđăh hơnăp jang đơ̆ng dôm pang păng găh gơh kĭ đơ̆ng bu găh xăh dăh mă dêh char vă bơ̆jang kiơ̆. Kiơ̆ đơ̆ng ‘noh, ƀơ̆t đei pơhrăm bơih ‘noh dang ei dôm bơngai jang hlôi băt hơdăh hơnăp jang lơ̆m tơdrong jang tơlĕch jên jang tơmơ̆t jên jang teh đak păng pơđĭ hloi iŏk pơ ‘ngoăih teh.”

 Ƀơ̆t dôm tơdrong tơhlăk găh pơgơ̆r, bơngai jang, hla ar păng hơnăp jang rim tơdrong ƀrư̆ ƀrư̆ đei hơmet ‘lơ̆ng, jên tơmơ̆t jang teh đak gô đei hiôk, pơm tơdrong ‘lơ̆ng ăn dôm tơdrong jang bơ̆jang ƀlep trong tơlĕch jang. ‘Nâu kŭm jing hơyak gĭt kăl Đắk Lắk pơtrŭt hơtŏk tơiung anih jang kăl, tơgop hơtŏk tơiung mŭk drăm - tơpôl kơjăp lơ̆m khei ‘năr đơ̆ng rŏng tơmơ̆t hơdai.