Dôm hơnih tăh kơphiê̆u hrôih đei hơmet ăn tơ̆ dôm xăh Hòa Phú, Buôn Đôn, Ia Rvê, Ia Lốp păng dôm phường Buôn Ma Thuột, Bình Kiến. Bơngai vang akŏm ‘noh jĭ kang ƀô̆, khŭl lĭnh găh Anih tơm pơgơ̆r khŭl lĭnh dêh char, Ƀô̆ đô̆i vei lăng tơring sơlam păng Kŏng an dêh char. Jơ tăh kơphiê̆u pơgơ̆r đơ̆ng 7 jơ pơgê truh 7jơ kơmăng ‘năr 14/3.

Lơ̆m noh, khŭl lĭnh Ƀô̆ đô̆i vei lăng tơring sơlam đei 8 hơnih tăh kơphiê̆u hrôih tơ̆ dôm kơđông lĭnh vei lăng tơring sơlam păng anih jang ƀơm truh; Kŏng an dêh char pơgơ̆r tơ̆ 2 hơnih tơ̆ kơsô̆ 58 Nguyễn Tất Thành păng 457 Lê Duẩn; dôm anih jang Khŭl lĭnh pơgơ̆r tơ̆ hơnih hôp Tiểu đoàn Bộ binh 303 păng dôm anih jang ƀơm truh. Vă vei sơđơ̆ng tơdrong tăh kơphiê̆u hrôih ƀlep tơdrong hơgăt, sơđơ̆ng, tơpăt, Anih pơgơ̆r pôk rơih dêh char Đắk Lắk athei rim anih jang pơjing trong tơlĕch jang hơdăh, dăr hơlen lăng dôm tơdrong hơmet ăn; tŭn pran roi tơbăt, pơklep hơnăn bơngai tăh hla, jơ năr păng hơnih tăh kơphiê̆u.