Tơdrong đei bơngơ̆t truh akŏm lơ̆m tơdrong tơlĕch jên tơmơ̆t jên jang teh đak, trong nơnăm hư kơnê̆, tơdrong jang iŏk pơ ‘ngoăih teh dôm tơdrong jang tơm, thu jên lơ blŭng sơnăm hŏk, kŭm hăm tơdrong vei lăng anih hơmet găh jĭ hơnĕnh.

Tơl nơ̆r apĭnh đơ̆ng bơngai chih kơtơ̆ng ang ăn Radiô nơ̆r pơma VN, ƀok Trương Công Thái, Phŏ Kơdră Anih vei lăng kon pơlei dêh char, roi tơbăt sơnăm 2025 Đắk Lắk đei klăih song hloh 16 rơbâu ti hlak jên, mă lei truh hơtuch khei 8 mă tơlĕch jên jang tam mă iŏk đei 40%. Dêh char hlôi đei hla ar hơmet ming, athei dôm anih jang tơtĕnh pơm đang hla ar, vei sơđơ̆ng jang đang tơdrong hơgăt tơlĕch jên jang lơ̆m sơnăm. Anih vei lăng kon pơlei dêh char pơma hơdăh gô khŏm pơgơ̆r jang vă tŭn hrĕnh trong jang, pơm lăp hăm ‘meh vă hơtŏk tơiung mŭk drăm - tơpôl.