Dôm năr ‘nâu, 5 ‘nu bơngai jang lơ̆m Grŭp jang kơsô̆ 1 – Khul vei lăng tĕch mơdro kơsô̆ 4, Anih vei lăng tĕch mơdro kơ dêh char Đắk Lắk hơnơ̆ng hơtŏk ka, bơ̆jang hloi tơ̆ ‘ngoăih kơ jơ jang. Mŏ Nguyễn Thị Minh Hạnh, jang lơ̆m grŭp ăn tơbăt, dôm bơngai jang oei chă hơlen năng tơmam, vei kơjăp tơdrong pơm tơlĕch tech mơdro đơ̆ng hlŏh 1.800 anih jang tơ̆ tơring kơdrâm Buôn Ma Thuột.   

“Grŭp jang jur truh tơ̆ rim unh hnam tĕch mơdro, khul grŭp, dôm bơngai vă roi tơbăt, athei pơm kiơ̆ mă ‘lơ̆ng dôm tơdrong hơgăt đơ̆ng luơ̆t mưh pơm tơlĕch, tech mơdro tơmam. Lơ̆m noh, athei dôm unh hnam mưh răt iŏk tơmam vă tĕch athei rơih tơmam 'lơ̆ng, băt hơdăh anih pơm, pơklĕm kơjă păng tĕch trŏ kơjă, ưh gơ̆h hơtŏk kơjă kư̆ kă, mong ôn tơmam gô yă tŏk; atŭm hăm ‘nŏh athei hơmet tôm tơmam, pơtruh măh mai ăn bơngai răt ƀât Tết Nguyên đán.”

Yă Võ Thị Bạch Nga, tơ ‘ngla 1 anih tĕch tơmam tơ̆ phường Tân Lập, dêh char Đắk Lắk tơroi, hơnơ̆ng mưh truh ƀât vă jê̆ Tết Nguyên đán rim sơnăm, anih jang kơpal truh roi tơbăt dơ̆ng, athei unh hnam kĭ pơkăp tĕch mơdro mă tơpăt ‘lơ̆ng, rơđăh rơđong, trŏ luơ̆t: “Ƀât blŭng khei 1/2026, Anih vei lăng tĕch mơdro hlôi tơgŭm, roi tơƀôh, athei kĭ pơkăp mă mônh ‘nŏh: Răt iŏk tơmam vă tĕch băt hơdăh anih pơm, tơmam ‘lơ̆ng, chih hơdăh khei ‘năr gơ̆h răt yoa; Mưh hơtŏk yă tĕch athei pơm kiơ̆ mă trŏ luơ̆t. Athei hơmet tôm tơmam vă tĕch ăn tơmoi…”

Bơ̆ jang khei jang tang găn tơmam ya, tơmam ưh ‘lơ̆ng adrol, lơ̆m păng đơ̆ng rŏng kơ Tết Nguyên đán 2026 kiơ̆ nơ̆r pơtho đơ̆ng Anih pơgơ̆r jang 389 dêh char Đắk Lắk, đơ̆ng tŏk bŏk khei 12/2025 truh dang ei, Anih vei lăng tech mơdro dêh char Đắk Lắk hrơ̆ch pơgơ̆r năm jang, dăr lăng tơdrong pơm tơlĕch, tĕch mơdro tơ̆ tơring, akŏm găh dôm tơmam yoa kăl ƀât Tết. Kiơ̆ đơ̆ng hơlen năng, khul jang kơpal chă ƀôh, sek tơlang 242 anih jang pơm glăi, sek phak hlŏh 2,3 ti hlak jên; atŭm hăm ‘nŏh thu iŏk, sŏh hŭt lơ kơloăi tơmam pơm glăi đei kơjă hlŏh 700 triu hlak jên.

Ƀok Vương Minh Sơn – Kơdră Anih vei lăng tĕch mơdro dêh char Đắk Lắk ăn tơbăt, mă đơ̆ng 1,2 tơring găh Hơlĕch pŭ hiong răm lơ đơ̆ng ‘mi tih đak lơ̆p, mă lei tơ̆ tơring păih Pơmât jang đei tơmam lơ, pơm ăn tơdrong răt yoa tơmam ƀât Tết gô tŏk đơ̆ng 25–30%. Anih vei lăng hơnơ̆ng pơtho ăn dôm khul jang hơtŏk tơdrong dăr lăng, vei kơjăp tơdrong pơm tơlĕch, tĕch mơdro tơ̆ tơring, tĕch kĭ trong so păng tĕch lơ̆m mang.

“Nhôn jang hơdoi hăm khul linh Kanh sat vei lăng muk drăm Công an dêh char, Thuê̆ dêh char tơlĕch jang hrơ̆ch tơdrong dăr lăng lơ̆m khei tơm âu; atŭm hăm ‘nŏh hơtŏk khul jang, gak prăt măng prăt năr, jô̆ hloi năr 6 păng năr 7, vă vei kơjăp anih tĕch mơdro kŭm nhen sơng iŏk nơ̆r tơroi đơ̆ng kon pơlei. Đon pơhnŏng ‘nŏh găn ưh ăn đei tơmam ya, tơmam ưh băt anih pơm đei chơ tĕch tơ̆ ‘ngoăih, kiơ̆ kơ ‘nŏh pơm ‘lơ̆ng ăn kon pơlei đei răt yoa tơmam ‘lơ̆ng ƀât Tết âu.”

Jĭ khul jang tơm lơ̆m khei  tang găn tơmam ya, tơmam ưh ‘lơ̆ng ‘măng mă âu ‘năi, hlŏh 1 khei âu ki, Anih kanh sat vei lăng mŭk drăm Công an dêh char Đắk Lắk phă đei 274 tơdrong sek tơlang 279 ‘nu bơngai pơm glăi ƀơm truh tơmam kâm, tơmam đe chơ tĕch ôn, tơmam ưh kơ ‘lơ̆ng; tĕch hơdrĕch ƀa ưh băt  đơ̆ng yơ; pơm tơlĕch tĕch mơdro pơgang sơdrông ya, tĕch ôn hât, kơmlăi...

Vă hơnơng hơtok tơdrong tang găn đe pơm glăi adrol, lơ̆m păng đơ̆ng rŏng kơ Tết Bính Ngọ, Trung tá Trịnh Ngọc Hà, Phŏ Kơdră Anih Kanh sat vei lăng mŭk drăm, Công an dêh char Đắk Lắk tơroi, anih jang hlôi chih hơdăh dôm tơdrong jang tơm vă bơ̆ jang: “Khul linh kanh sat vei lăng muk drăm, công an Đắk Lắk hơnơ̆ng kơchăng bơ̆ jang ‘lơ̆ng vă gơ̆h băt hrôih, băt hloi tơ̆ anih pơm, kŭm nhen rim tơdrong tơ̆ tơring păng lơ̆m mang. Tơm ‘nŏh jĭ dôm trong gre gĭt kăl, mă loi ‘nŏh trong gre 1A kơdâu klĕch dêh char Đắk Lắk, kŭm nhen dôm anih gĭt kăl nhen kơchơ tơm, anih tĕch mơdro, anih mong, anih gre dơ̆ng, dôm anih hơnơ̆ng đei yoa vă pơm anih mong ôn tơmam, tơmam ya. Đơ̆ng noh, jang hơdoi kơjăp hăm khul jang kơpal pơgơ̆r chă druh rôp păng sek tơlang mă ‘lơ̆ng rim tơdrong pơm glăi luơ̆t.”

Tơdrong kơchăng, bơ̆ jang pran ‘lơ̆ng đơ̆ng khul jang kơpal kơ dêh char Đắk Lắk mưh tang găn hăm rim tơdrong pơm tơlĕch, chơ chuĕn, tĕch mơdro tơmam ya, tơmam ưh kơ ‘lơ̆ng ƀât Tết Bính Ngọ 2026 oei hơnhăk ba lơ tơdrong ‘lơ̆ng. Anih tĕch mơdro ƀât Tết hơnơ̆ng đei vei lăng, vă tĕch rim tơmam ‘lơ̆ng ngăl, vang tơgop pơm ăn kon pơlei sơđơ̆ng jơhngâm răt tơmam, sơng xa Tết hiôk sơđơ̆ng, ‘lơ̆ng hơiă, ‘nă hal./.