‘Nou jĭ tơdrong jang tôch git kăl lăng truh kơkuh chơt hơ iă 80 sơnăm Năr pơgơ̆r Pôk rơih blŭng a kơ Kuô̆k hô̆i Việt Nam păng kơkuh chơt hơ iă Hop akom tih kơdră tang măt lơ̆m teh đak ‘măng mă XIV kơ Đảng. Rup man Ƀok Hô kơ yuơ Hơnih tơm Ƀô̆ đô̆i vei lăng sơlam teh đak pôk ăn đei pơm tơlĕch hăm hling kong, tơƀôh hơdăh um ai ‘lơ̆ng rŏ, dim rơnim kơ Ƀok Hô. Rum trăp 70 kĭ, kơjung 80cm, tor 74cm păng să 35cm. Tơdrong pôk ăn rup Ƀok Hô jĭ tơdrong jang tôch gĭt kăl chinh trĭ, pôk pơ ư tơdrong tơgop tih tên đơ̆ng Ƀok Hô hăm hơdrĕch hơdrung Việt Nam. ‘Nou jei jing jơhngơ̆m đon chơt hơ iă, hơmŏ kơtang kơ Đảng, Teh đak păng Khul ƀô̆ đô̆i pơtruh ăn khul kơdră Đảng, Kơdră chĕp pơgơ̆r tơring păng kon pơlei lơ̆m chăl atŏk tơ iung ‘nao; tơgop hơnơ̆ng atŏk kơtang jơhngơ̆m đon tơgoăt tơgoăl, drơ̆ng mĭnh nơ̆r, atŏk tơ iung kơtang hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô.