Pơma tơ̆ jơ pơm lêh, Kơdră vei lăng kon pơlei dêh char Tạ Anh Tuấn pơma hơdăh hơnăp jang gĭt kăl đơ̆ng anih dăr hơlen lơ̆m tơdrong pơjing khul kơdră pơgơ̆r rơgŏh ‘lơ̆ng, jang rơgei, đei yoa. Ƀok lui Kơdră chĕp kơ̆l Anih dăr hơlen ‘nao vă hơtŏk đon jang tơnăp, hơtŏk tơdrong đei yoa đơ̆ng tang găn xa pơjĭp, pơhuach kư̆ kă, sek tơlang tơdrong tơkêng.

Kơdră vei lăng dêh char oei pơjao ăn anih dăr hơlen jăh hơlen năng hla ar chih luơ̆t, hơmet kơjăp tơdrong mât 1 ƀơ̆r đon lơ̆m anih jang, hơtŏk đon rơgei, jơhngâm đon ‘lơ̆ng đơ̆ng kăn ƀô̆. Ƀok Hồ Duy Thành hŏk Cử nhân mŭk drăm, Cử nhân Luơ̆t, Thạc sĩ Lý luận păng Lịch sử Teh đak păng khôi luơ̆t, Cao cấp Lý luận chính trị. Adrol kơ iŏk jang kơchư̆k ‘nao, ƀok Hồ Duy Thành jĭ Bí thư Đảng apŭng, Kơdră Jơnŭm pơgơ̆r kon pơlei apŭng M’Đrắk păng pơm Phŏ Kơdră chĕp kơ̆l Anih Dăr hơlen Đảng dêh char Đắk Lắk.