Đơ̆ng pơgê hrôih hloi, tôch kơ lơ kon pơlei tơring Hòa Thịnh hăm rim tơring tơjê̆ hlôi ƀôh kang bang kơl tơ̆ Hơnih man tơbăt vă tơklăh ti rim ƀô̆ đô̆i. Tơdrong chă rôp ti dih băl kơjăp pă ‘meh tơpeh păng dôm kơtoh đak măt hlôi pơm ăn jơ tơklăh dih băl măh chhưu lơ̆m jơhngơ̆m, pơtôch vă jê̆ ƀar khei ƀô̆ đô̆i kon pơlei vang iung jang đơ̆ng rŏng ‘mi kial đak lip pơrăm. Ƀôh kang bang kơl jơ ‘năr ou đơ̆ng hrôih, duch Nguyễn Thị Hồng Nhị, kô pơtho Hnam trương Mân non Hòa Thịnh - hơnih oei pơgia kơ rim khul ƀô̆ đô̆i, adoi jing hơnih tơgoăt kơjăp jơhngơ̆m đon tơgoăt tơgoăl dih băl ƀar păh ƀok thây kô, hŏk tro hăm đe ƀô̆ đô̆i, tơbăt:“Lơ̆m khei năr kang ƀô̆ ƀô̆ oei lơ̆m hnam trương ‘noh jơhngơ̆m đon tơgoăt tơgoăl dih băl, tơklep hăm đe hŏk tro, kơdih rim ƀok thây kô pơtho jei tôch ‘mêm kơ eng kơ rim đe ma ƀô̆ đô̆i, dang ei tơklăh ti hăm rim đe ma ƀô̆ đô̆i ‘noh mah chhưu lơ̆m jơhngơ̆m tơpă mơ̆n. Năr ou jĭ năr tuch luch tơƀơ̆p đe ma ƀô̆ đô̆i, dang ei lơ̆m pơlei rơheng kơkot, dôm kơchơ jei pă đei ƀôh đe ma ƀô̆ đô̆i, ưh kơ jor ning nai kai ning mônh kơnh ƀlŏk hơdơ̆r kơ đe ma dêh. Lơ̆m jơhngơ̆m đon ling lang hôn bơnê dôm tơdrong tơgop tih tên đơ̆ng đe ma ƀô̆ đô̆i”.

Jĭ mĭnh lơ̆m dôm hơnih tơklep kơjăp hăm tơring đơ̆ng dôm năr ‘mi kial đak lip blŭng a, Trung úy Phan Ngọc Dân, Trung đoàn 584, Hơnih tơm Ƀô̆ đô̆i dêh char Dak Lăk tơbăt, hơnih hlôi iung jang ting ring jang dŏng tơgŭm kon pơlei, adoi iung jang hloi hơmet pơ ‘lơ̆ng dôm tơdrong ‘mi kial đak lip pơrăm păng pơjing dơ̆ng hnam oei ăn kon pơlei lơ̆m tơring ‘mi kial đak hơbông pơrăm:“Năr ou lơ̆m jơ ‘năr tơklăh dih băl ou, kon pơlei hlôi iung đơ̆ng 5 jơ vă pai por ‘nhot ăn kơ nhôn sŏng sa pơgê, lăp đơ̆ng rŏng sŏng sa đang kon pơlei nhơ̆m tôch kơ lơ, ưh kơ pơ̆n năm tơ̆ ou ba nhôn brŏk kơna ba jei chhưu jơhngơ̆m tơpă mơ̆n. Mưh brŏk tơ̆ hơnih jang ưh kơ jor ĭnh hăm bôl boăl lơ̆m khul gô ƀlŏk hơdơ̆r dôm jơ ‘năr oei hơdoi hăm kon pơlei lơ̆m jơ ‘năr ‘mi kial đak lip pơrăm vă tơ iung pơjing dơ̆ng tơdrong hơrih sa sơđơ̆ng ăn kon pơlei”.

Đơ̆ng năr 1/12/2025 truh năr 10/1/2026, hloh 204.000 ‘nu kang ƀô̆, ƀô̆ đô̆i Quân khu 5, Hơnih tơm Ƀô̆ đô̆i dêh char Dak Lăk păng khul Yân kuân tư̆ vê̆ hăm vă jê̆ 6.000 tong gre kmăi kmŏk hlôi đei ba truh, pơgơ̆r pơjing đei 331 khul, tơlĕch jang ming man 331 pơbŭng hnam oei tơgŭm ăn rim ŭnh hnam kon pơlei đei hnam hơlih păng ming hơmet 90 pơbŭng hnam hư răm kơtang tơ̆ 13 tơring, phương. Atŭm hăm ‘noh, rim khul hlôi vang iung jang yông dang 11.300 ŭnh hnam hăm hloh 36.000 ‘nu bơngai năm truh hơnih sơđơ̆ng; hơmet pơ ‘lơ̆ng 207 hnam trương hŏk, 42 hnam pơgang, 281 hnam hop akŏm pơlei, 38 hơnih bơ̆ jang vei lăng kon pơlei; hơmet ming hloh 50km trong nơnăm păng tơgŭm hloh 3.500 ŭnh hnam hyum rơgoh hnam oei, sơđơ̆ng hơrih sa. Hơdrô̆ găh trong nơnăm, pơnơ̆t đak tơgum ăn choh jang sa Pơyan phang, rim hơnih hlôi tơlĕch jang 50 khul, 98 hơnih jang keh đang 63.220 met hơnih ming man.

Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk Đào Mỹ pơma hơdăh dôm tơdrong tơgop gĭt kăl tih tên đơ̆ng khul ƀô̆ đô̆i lơ̆m prăt jơ ‘năr iung tơjră tang găn păng ming hơmet đơ̆ng rŏng ‘mi kial pơrăm:“Um rup ƀô̆ đô̆i oei sa hơdoi hăm kon pơlei bơ̆n lơ̆m jơ ‘năr tôch mơmat tat hrat hrĭn mă lei ƀĕnh ƀang jơhngơm đon ‘mêm kơ eng dih băl. ‘Nou jĭ dôm um rup, dôm tơdrong jang ‘lơ̆ng hơ iă. Ĭnh tang măt ăn khul kơdră chĕp pơgơ̆r dêh char bơnê kơtang hloh truh hăm rim khul ƀô̆ đô̆i kŏng ang pơma atŭm păng khul ƀô̆ đô̆i pơma hơdrô̆ lơ̆m khei năr ou ki  păng mă kăl ‘noh “ ‘Măng iung jang Quang Trung” păng năr ou bơ̆n dơ̆ng tơ̆ ou vă chă pơma tơhlăh ti dih băl”.

Pơtôch jơ pơm lêh, Đại tá Cao Văn Mười, Kơ iĕng Kơdră chĕp pơgơ̆r Quân khu 5 sơkơ̆t hơdăh “ ‘Măng iung jang Quang Trung” ưh khan lăp pơjing đei pơbŭng hnam kơjăp ‘lơ̆ng, mă oei pơjing đei jơhngơ̆m đon ‘mêm kơ eng dih băl tôch kơtang găh jơhngơ̆m đon pơvei dih băl ƀô̆ đô̆i kon pơlei, găh jơhngơ̆m pran kơ jơhngơ̆m đon ‘mêm mơnat dih băl păng tơgoăt tơgoăl dih băl kơjăp iăp kơtang:“Mĭnh hơnih ming man, rim pơbŭng hnam keh đang ưh khan lăp mŭk drăm mă oei tơƀôh hơdăh jơhngơ̆m đon lui kơjăp, kơ ƀô̆ đô̆i kon pơlei ưh kơ lai yơ tơpleh, jĭ tơdrong tơnŏ jơhngơ̆m đon kơ kon pơlei ‘noh nơ̆r sơkơ̆t hơdăh tơ̆ yơ kon pơlei tơƀơ̆p tơnap tap tơ̆ noh ƀôh kang bang kơl khul ƀô̆ đô̆i. ‘Măng iung jang Quang Trung pơtôch hlôi pơjing ăn dơ̆ng tơdrong tơgoăt joăt joe ƀô̆ đô̆i đei đơ̆ng kon pơlei, kơ yuơ kon pơlei mă pơvih pơvăn kơ Ƀô̆ đô̆i Ƀok Hô, chih dơ̆ng nơ̆r hơri nuih mơng chăl sơnăm rơngei hiôk hian, tơƀôh hơdăh jơhngơ̆m pran kơ tơdrong tơgoăt tơgoăl pôm nơ̆r ƀơ̆r đon kơjăp, tơdrong vang iung jang kơtang đơ̆ng pơđĭ khul chinh trĭ păng kon pơlei. ‘Măng iung jang Quang Trung hlôi pơtôch pơjing dơ̆ng jơhngơ̆m đon ‘mêm kơ eng dih băl, dôm pơbŭng hnam tơnŏ kơjăp ‘lơ̆ng păng mă kăl ‘noh jơhngơ̆m đon tơgoăt tơgoăl dih băl kơjăp iăp kơtang ƀô̆ đô̆i kon pơlei”.