Anih vei lăng kon pơlei dêh char Đắk Lắk ‘nao pơgơ̆r ‘măng hop akŏm dăr hơlen tơdrong tơlĕch jang dôm hơnăp jang khoa hŏk, kơmăy kơmŏk, tơplih ‘nao hơgei păng tơplih kơsô̆ lơ̆m tơring, akŏm hơmet pơ ‘lơ̆ng pơmat tat vă vei sơđơ̆ng ‘lơ̆ng dôm hơnăp jang hlôi tơlĕch ăn. Jăl jang 2023–2026, dêh char tơlĕch 21 hơnăp jang khoa hŏk păng kơmăy kơmŏk kơ dêh char hăm akŏm kon jên hloh 37 ti hlak jên, akŏm lơ̆m jang choh jang sa kơmăy kơmŏk ‘nao, pơm tơlĕch, pơgang hla ‘long păng tơplih kơsô̆. Đơ̆ng sơnăm 2021 truh dang ei, Đắk Lắk kŭm tơlĕch jang 19 tơdrong jang tơm găh kơmăy kơmŏk kơtơ̆ng ang păng anih jang kăl tơplih kơsô̆. Hơdrô̆ sơnăm 2026, tơring hơmet ăn dang 300 ti hlak jên ăn dôm tơdrong jang ‘nao nhen hơtŏk tơdrong jang hop akŏm trực tuyến truh rim xăh, chih răk kơsô̆ păng pơjing tơdrong chih răk kơsô̆ pơyua ăn tơdrong jang pơgơ̆r, vei lăng tơdrong sơđơ̆ng.

Yă Hồ Thị Nguyên Thảo, Phŏ Kơdră Anih vei lăng kon pơlei dêh char Đắk Lắk athei rim anih jang, tơring băt hơdăh hơnăp jang, akŏm hơmet pơ ‘lơ̆ng hơnih tơhlăk, hơtŏk ‘lơ̆ng bơngai jang păng pơih să rim tơdrong jang đei yua.

“Rim anih jang, rim tơring athei băt hơdăh đei hơnăp jang pơm kiơ̆ tơdrong Tơchơ̆t 57 đơ̆ng anih jang bơ̆n păng đei trong tơlĕch jang mă hơdăh kiơ̆ lơ̆m 8 ƀai toan tih găh khoa hŏk kơmăy kơmŏk, tơplih ‘nao hơgei mă Anih jang Đảng dêh char hlôi pơdrơ̆ng kiơ̆, Anih pơgơ̆r jang hlôi pơdrơ̆ng kiơ̆ păng Anih vei lăng kon pơlei dêh char hlôi pơjao. ‘Ngoăih kơ dôm trong jang tơgŭm đơ̆ng Trung ương ‘noh kăl kơ dôm trong jang tơgŭm kiơ athei Jơnŭm jang tơlĕch ăn, tơgŭm hơdrol găh kơmăy kơmŏk kơtơ̆ng ang, tơmam kơmăy ăn rim tơring. Răp hơlen lăng rim giĕng, dôm hơnăp jang pơjao hơdăh adoi athei đei trong tơlĕch jang mă rơđăh vă jang đang dôm tơdrong hơgăt”.

Ƀơm truh hơnăp jang tơplih kơsô̆, Anih jang Khoa hŏk păng Kơmăy kơmŏk Đắk Lắk ‘nao bơ̆jang hăm Hnam trưng Đại học Tây Nguyên, drơ̆ng nơ̆r tŭn pran hŏk thạc sĩ, tiến sĩ lơ̆m dôm tơdrong jang kơmăy kơmŏk kơtơ̆ng ang, chih răk kơsô̆ păng kơmăy kơmŏk sinh hŏk; tơklep pơtho pơhrăm hăm tơchĕng hơlen, pơhrăm kơtă tơ̆ dôm hơnih jang kơmăy kơmŏk kơ dêh char. Tiến sĩ Đinh Hữu Hùng, Kơdră khoa Y Dược, Hnam trưng Đại học Tây Nguyên akhan dôm tơdrong jang tơchĕng hơlen kăl kơ lăng kiơ̆ kơ tơring vă hơnhăk ăn đei yua ‘lơ̆ng ăn kon pơlei.

“Ĭnh tơchĕng akhan dôm tơdrong jang truh âu kơnh, tơdăh nhen Anih jang Khoa hŏk păng Kơmăy kơmŏk iŏk chă bơngai jang kiơ̆ lơ̆m hnam trưng, athei lăng kiơ̆ lơ̆m dôm tơdrong kăl hơdrô̆. Păng mă loi ‘noh đơ̆ng rŏng kơ tơmơ̆t hơdai ‘noh kŭm athei lăng kiơ̆ lơ̆m dôm tơdrong kăl hơdrô̆ tơ̆ păih Hơlĕch kơ dêh char. Păng lơ̆m noh đei dôm tơdrong mă hrei ‘nâu lơ̆m tơdrong Tơchơ̆t 72 kŭm tơroi truh tơdrong hơmet ming dăh mă hơtŏk tơiung hăm tơdrong jang pơgang. Bơ̆n lăng kiơ̆ lơ̆m noh gô hơnhăk ăn đei yua ‘lơ̆ng ăn kon pơlei hloh”.

Kiơ̆ kơ ƀok Phạm Gia Việt, Phŏ Kơdră vei lăng Anih jang Khoa hŏk păng Kơmăy kơmŏk Đắk Lắk, tơdrong tơlĕch jang tơdrong Tơchơ̆t 57 gô tơlĕch ăn ‘meh vă kơjung hloh găh pơtho pơhrăm bơngai jang pơvih pơvăn tơplih kơsô̆ păng hơtŏk tơiung mŭk drăm - tơpôl.

"Lơ̆m tơdrong Tơchơ̆t 57 ‘noh tơplih kơsô̆ păng pơtho pơhrăm kang ƀô̆ găh tơplih kơsô̆ tơ̆ hơnăp kơnh gô tŭn pran tơdrong ‘nâu. Păng mă loi ‘noh lơ̆m tơdrong rơih iŏk dôm tơdrong jang vă tơgop hơtŏk tơiung mŭk drăm tơpôl, tơgop hơnhăk mŭk drăm tŏk iŏk đei tơdrong hơgăt 2 kơsô̆ kơ dêh char Đắk Lắk."

Hơdai hăm ‘noh, Khŭl vei lăng Hơnih Choh jang sa Kơmăy kơmŏk hơgei pơlei tơm Hồ Chí Minh jang hơdai hăm Anih jang Khoa hŏk păng Kơmăy kơmŏk Đắk Lắk tơlĕch jang tơdrong pơlong “Tơiung pơjing tơdrong sa tơplih ‘nao lơ̆m tơdrong jang choh jang sa iŏk yua kơmăy kơmŏk hơgei sơnăm 2026” tơring Tây Nguyên hăm hơnăn “Choh jang sa ‘lơ̆ng - Pơ jing hơnăp rơgoh”. Tơdrong pơlong yak truh tơchă dôm tơdrong jang iŏk yua kơmăy kơmŏk kơsô̆, kơmăy kơdâu kơdih păng kơmăy kơmŏk sinh hŏk vă hơtŏk ‘lơ̆ng kơjă tơmam đơ̆ng choh jang sa đei, hơtŏk tơiung choh jang sa kơjăp. Jơnei mă mônh ‘măn kơ dôm bơngai, anih mơdro sa đei akŏm kơjă 150 triệu hlak jên; dôm tơdrong jang ‘lơ̆ng oei đei tơdrong hiôk iŏk tơgŭm tôch ai 400 triệu hlak jên vă pơm hơtŏk tơiung.

Ƀok Nguyễn Thanh Hiền, Phŏ Kơdră Khŭl Vei lăng Hơnih Choh jang sa Kơmăy kơmŏk hơgei pơlei tơm Hồ Chí Minh tơbăt tơdrong pơlong ‘noh jĭ tơdrong hiôk tơgoăt jên jang đơ̆ng pơlei tơm Hồ Chí Minh păng dôm dêh char Tây Nguyên, pơtrŭt cham char tơplih ‘nao hơgei lơ̆m choh jang sa.

“Lơ̆m jăl jang hrei ‘nâu, hăm tơdrong Tơchơ̆t 57 ‘noh bơ̆n đei tơdrong hiôk tôch kơ ‘lơ̆ng lơ̆m tơdrong tŭn pran iŏk yua khoa hŏk kơmăy kơmŏk, păng lơ̆m noh dôm tơdrong jang nhen găh kơmăy kơmŏk kơdâu kơdih lơ̆m pơm tơlĕch, đang kơ ‘noh ứng dụng AI, kơsô̆ tơring pơtăm vă hơtŏk ‘lơ̆ng kơjă tơmam đơ̆ng choh jang sa đei. Yua đơ̆ng noh nhôn jang hơdai hăm Anih jang Khoa hŏk păng Kơmăy kơmŏk Đắk Lắk pơgơ̆r tơlĕch jang tơdrong pơlong tơring ‘nâu vă tơchă dôm tơdrong tơchĕng vă đơ̆ng noh hơnơ̆ng tơgŭm rim buăl hơtŏk tơiung, hơtŏk ‘lơ̆ng tơdrong jang đơ̆ng kơdih, mă loi ‘noh iŏk yua pran lơ̆m yan âu vă pơjing dôm anih mơdro sa pran vă hơtŏk ‘lơ̆ng kơjă tơmam đơ̆ng choh jang sa phĕ iŏk păng tĕch tơ̆ teh đak đe”.

Hăm tơdrong tŭn pran khoa hŏk kơmăy kơmŏk, tơplih ‘nao hơgei păng tơplih kơsô̆, Đắk Lắk kŭm hăm dôm dêh char Tây Nguyên tŏk bŏk dar deh pơm tơdrong ‘lơ̆ng ‘nao ăn jang tŏk, tơgop bơ̆jang kiơ̆ tơdrong hơgăt hơtŏk tơiung hrĕnh, kơjăp lơ̆m chăl yak tŏk kơ teh đak.