Việt Nam păng Thái Lan jĭ 2 teh đak tơ jê̆ băl, đei lơ tơdrong đei yua vă lei lăi băl lơ̆m pơvei tơdrong rơngei, sơđơ̆ng, jang hơdai păng hơtŏk tơiung tơ̆ tơring. Yak hloh vă jê̆ 50 sơnăm jô̆ đơ̆ng ƀơ̆t pơjing tơdrong pơvei jang tơbôl, tơdrong pơvei 2 teh đak ưh kơ đei pơdơh đei hơmet ming păng hơtŏk tơiung pran kơtang, tôm tong, jing 1 lơ̆m dôm tơdrong pơvei ‘lơ̆ng păng đei yua hloh lơ̆m ASEAN.

Thái Lan dang ei ‘noh jĭ teh đak tĕch mơdro tih hloh kơ Việt Nam lơ̆m ASEAN, hăm jên tĕch mơdro 2 păh sơnăm 2025 đei hloh 22 ti USD. 2 teh đak jang mŭk drăm roi ‘năr roi tơklep hơdai jrŭ hloh lơ̆m tơdrong tĕch mơdro lơ̆m tơring. Đơ̆ng rŏng jơ pơma đam, Tổng Bí thư, Kơdră teh đak Tô Lâm păng Thủ tướng Thái Lan Anutin Charnvirakul hlôi vang dơ̆ng lăng Lêh pơjao dôm hla ar jang hơdai đơ̆ng anih tơm, anih jang 2 teh đak. Ƀlep ƀơ̆t ‘măng âu, Tổng Bí thư, Kơdră teh đak Tô Lâm păng Thủ tướng Anutin Charnvirakul hlôi vang kơtĭt kơmăy et hơtŏk Logo tơbăt 50 sơnăm pơjing tơdrong pơvei jang tơbôl Việt Nam – Thái Lan.