Hop akŏm đei pơgơ̆r kơtă păng trư̆k tuyê̆n truh 33 hơnih tơ̆ dôm dêh char, pơlei tơm. Kơdră Kuô̆k hô̆i ră hơdah, jăl jang ou ki jĭ minh jăl jang kăp gĭt kơ Hô̆i đŏng kon pơlei dôm jăl jang, teh đak athei tơjră hăm lơ tơnap tap, hrat hrĭn tam mă lah đei: pơrang jĭ COVID-19, tŏ pơđang đak hơbông, tŏ 'mi kial tơplih pơrăm trăp trĭn; tơpôl apŭng plenh teh tơsŭl tơsăl, pơm tơnap tap. Đảng, Teh đak tơchơ̆t tơlĕch lơ trong pơm jang gah tơplih 'nao hơtŏk tơ-iung, tơplih kơsô̆ kơ teh đak, ming pơ-'lơ̆ng jơnŭm pơgơ̆r, pơkăp sơnong pơgơ̆r păng hơmet 'lơ̆ng hơnih jang hanh chĭnh.

Lơ̆m khei năr noh, hăm tơdrong pơgơ̆r kơjăp đơ̆ng Trung ương,  Hô̆i đŏng kon pơlei dôm jăl jang hlôi adrin găn hloh tơnap tap, pơtoi sơkơ̆t sơnong jang kơ hơnih jang pơgơ̆r kơpal hloh tơ̆ tơring, tang măt ăn đon tơchĕng, tơdrong hơpơi 'meh păng tơdrong pơm tơm đơ̆ng kon pơlei. Mă lei, Kơdră Kuô̆k hô̆i adoi akhan, tơdrong jang kiơ̆ pơkăp jơnŭm pơgơ̆r 2 tăl oei ƀơm lơ tơnap tap: tơring vei lăng să hloh, tơdrong jang lơ hloh, tơchơ̆t kơjung hloh; tơdrong hơgei kơ đe kang ƀô̆ tơ̆ minh ƀar tơring oei kơđeh; hơnih jang, kơmăi kơmŏk tơroi tơbăt tam mă drơ̆ng minh. Kơdră Kuô̆k hô̆i Trần Thanh Mẫn pơtruh nơ̆r hăm Hô̆i đŏng kon pơlei dôm jăl jang athei tơchơ̆t jang 'nao, đei đon tơchĕng 'nao, pơjing trong jang hơgei hloh, iŏk yua khua hŏk kŏng ngê̆ tơplih kơmăi kơsô̆, kơ̆l 'ngok hơgei 'nao lơ̆m pơm jang.